Ukraine: Umukuru w'ubutasi avuga ko abasirikare b'Uburusiya bari kwitegura kurwana kuri Kherson

Hugo Bachega i Kyiv na Elsa Maishman i London

BBC News

Umukuru w'ubutasi bwa Ukraine avuga ko Uburusiya burimo kohereza abandi basirikare mu mujyi w'ingenzi wa Kherson uri mu majyepfo kandi ko bushobora kuba burimo bwitegura kuwurwanaho.

Mbere, Ukraine yari yarumvikanishije ko imitwe imwe y'abasirikare b'Uburusiya ishobora kuba irimo kuva muri uwo mujyi.

Uburusiya bwafashe Kherson mu minsi ya mbere y'iyi ntambara, ariko mu gihe cya vuba aha gishize uyu mujyi wakomeje kotswa igitutu, mu gihe abasirikare ba Ukraine barimo gutera intambwe mu nkengero y'umugezi wa Dnipro.

Abategetsi b'Uburusiya bari muri uwo mujyi bategetse abaturage b'abasivile babarirwa mu bihumbi kuhava.

Kyrylo Budanov, umukuru w'ubutasi bwa Ukraine, yapfobeje ibi, avuga ko ari "igikorwa [operation] cy'amakuru", abwira urubuga rw'amakuru Ukrainska Pravda ko Uburusiya burimo "kugerageza guteza urujijo ko buri kintu cyose cyaburangiranye".

Yavuze ko igisirikare cy'Uburusiya kirimo kohereza abandi basirikare muri uwo mujyi kandi ko kirimo gutegura uburyo bw'ubwirinzi mu mihanda.

Yongeyeho ko kuhakura abaturage ari ukugerageza kwikura mu isoni mu gihe uwo mujyi waba ufashwe na Ukraine.

Ibi bitandukanye n'ibyo Ukraine yari yatangaje mbere. Yari yavuze ko abasirikare b'Uburusiya bari barimo kuva muri uwo mujyi.

Budanov yagize ati: "Ntabwo barimo kwitegura kuhava ubu".

BBC ntiyashoboye kugenzura ingendo z'abasirikare ba buri ruhande ku rugamba.

Kumvikanisha ko abasirikare b'Uburusiya barimo gushinga ubwirinzi muri uwo mujyi, bituma habaho kwibaza ko bishoboka ko hazabera imirwano ikaze mu byumweru biri imbere.

Kuva mu ntangiriro y'uku kwezi kwa cumi, abasirikare ba Ukraine bakomeje gutera intambwe basatira Kherson.

Igisirikare cya Ukraine kivuga ko cyisubije ibyaro bigera hafi kuri 90 byo muri ako karere, bituwe n'abaturage 12,000.

Ku wa mbere, abategetsi bashyizweho n'Uburusiya i Kherson batangaje ishingwa ry'imitwe yitwaje intwaro, bavuga ko abagabo bazabona "akanya" ko kuyijyamo.

Ariko Serhiy Bratchuk, umuvugizi w'igisirikare cya Ukraine mu mujyi wa Odesa wo mu majyepfo, yavuze ko ibi ari ukujijisha kugira ngo binjize ku ngufu mu gisirikare cy'Uburusiya abagabo batuye i Kherson.

Gutsindwa i Kherson kwaba ari ikibazo gikomeye ku Burusiya.

Ni umurwa mukuru wa kamwe mu turere tune Perezida Vladimir Putin yagerageje komeka ku Burusiya nyuma y'ayiswe amatora ya kamarampaka (referendum).

Ni na wo murwa mukuru wonyine w'akarere wafashwe n'Uburusiya kuva bwagaba igitero kuri Ukraine mu kwezi kwa kabiri uyu mwaka.

Kandi intara ya Kherson ni yo igenzura umuryango werekeza muri Crimea, umwigimbakirwa Uburusiya bwiyometseho mu 2014 buwukuye kuri Ukraine.