Igisirikare cya Sudan kigiye guha ubutegetsi abasivile – Jenerali Burhan
Ahavuye isanamu, AFP
Umutegetsi wa gisirikare wa Sudan, Jenerali Abdel Fattah al-Burhan, yavuze ko igisirikare kizatuma habaho guverinoma y'abasivile.
Mu ijambo ryanyuze kuri televiziyo y'igihugu, yavuze ko abasirikare batazabangamira inzibacyuho (imfatakibanza mu Kirundi) iganisha kuri demokarasi, kandi ko ashishikajwe no gukora ku buryo habaho amatora.
Yavuze ko igisirikare kitazongera kuba mu biganiro bigamije kurangiza ibibazo bya politiki by'iki gihugu, umwanya wacyo mu biganiro ukaba wafashwe n'amatsinda y'imiryango idaharanira inyungu za politiki.
Ariko Jenerali Burhan ntiyavuze igihe uko guhererekanya ububasha bizabera.
Iki ni ikintu kinini igisirikare cyemeye kwigomwa.
Igisirikare kimaze igihe cyotswa igitutu n'abigaragambya baharanira demokarasi, bakomeje gukora imyigaragambyo mu bice bitandukanye by'igihugu.
Igisirikare cyafashe ubutegetsi mu kwezi kwa cumi mu 2021, nyuma yo guhirika guverinoma ya gisivile yari iyobowe na Minisitiri w'intebe Abdalla Hamdok, mbere yuko kimusubiza kuri uwo mwanya mu kwezi kwakurikiyeho.
Mbere, Jenerali Burhan yisubiyeho ku byo yari yiyemeje by'inzibacyuho iganisha kuri demokarasi.
Mbere y'iryo jambo ryo kuri televiziyo, abategetsi barekuye impirimbanyi 145 zari zafunzwe zifatiwe mu myigaragambyo yo ku itariki 30 y'ukwezi kwa gatandatu.
Abantu barenga 100 ni bo bamaze kwicwa kuva igisirikare cyahirika ubutegetsi mu kwezi kwa cumi mu mwaka ushize.
