Uko umuryango TFO ufasha abacuruzi kugurisha ibicuruzwa mu mahanga

I London mu Bwongereza harimo kubera imurikagurisha ry'ibicuruzwa by'ibiribwa n'ibinyobwa bivuye hirya no hino ku isi.

Mu bacuruzi barenga 1,350 bari muri iri murikagurisha ryatangiye ku wa mbere, barimo n'abavuye mu bihugu byo ku mugabane w'Afurika.

Umuryango Trade Facilitation Office (TFO, mu mpine), ufite icyicaro muri Canada, waje gufasha abacuruzi bo muri bimwe mu bihugu by'Afurika kugurisha ibicuruzwa byabo ku ruhando mpuzamahanga.

Bamwe mu bafashwa ni abo muri Ghana, Kenya na Ethiopia.

Uyu muryango kandi uvuga ko uri no kwitegura gufasha abacuruzi bo mu Rwanda no mu Burundi.

Umukuru w'imishinga yo muri Afurika muri TFO, Olivier Musafiri, avuga ko mu bicuruzwa by'abacuruzi bo muri Kenya na Ethiopia bari muri iri murikagurisha higanjemo icyayi n'ikawa.

Ibicuruzwa by'abo muri Ghana byo byiganjemo za 'chocolats'' n'amavuta azwi nka 'shea butter' abantu bisiga bakanayakoresha mu guteka.

Avuga ko ku bamukira ibicuruzwa bo muri Kenya, banazanye ibiryo bigizwe n'ibiribwa n'imbuto (ivyamwa mu Kirundi).

Mu Rwanda no mu Burundi ho ni ryari?

Muri aka karere k'Afurika y'uburasirazuba, Musafiri avuga ko kugeza ubu umuryango TFO ukorana n'abacuruzi bo muri Kenya na Uganda.

Gusa ngo nk'umuryango utegamiye kuri leta kandi udaharanira inyungu, uko uzagenda ubona inkunga ni ko uzarushaho gukorana n'abacuruzi bo mu bindi bihugu.

Ati: "Ntekereza ko ibyo na byo [u Rwanda n'u Burundi] bizaza byiyongera mu minsi ya vuba".

Musafiri avuga ko abagize uyu muryango bo bakura amikoro yo ku giti cyabo mu bufasha bahabwa na leta ya Canada, ari na yo muterankunga mukuru wabo, intego ikaba ari ukugira ngo "turusheho kurwanya ubucyene", nkuko abivuga.

Ati: "Kandi cyane cyane twibanda kuri ba bantu bakora ubucuruzi buciriritse, cyane biganjemo abadamu [abagore].

"Abadamu akenshi usanga bafite n'ibibazo byo kuba batabasha kubona ubushobozi butuma bagura [kwagura] ibikorwa bakora, rero ni yo mpamvu tubaha ubumenyi.

"Nyuma yo kubaha ubumenyi rero tukabazana mu bikorwa nk'ibi by'imurikagurisha kugira ngo ba bantu bacyeneye bya bicuruzwa byabo babashe guhura, babashe kuganira, ndetse babashe kugirana n'amasezerano kugira ngo barusheho kwagura ubwo bucuruzi bakora".

Kugeza ubu umuryango TFO ukorana n'ibihugu 15 byo muri Afurika, n'ibindi bihugu byo ku mugabane w'Aziya no muri Amerika y'Epfo.

Musafiri avuga ko kompanyi z'ubucuruzi bakorana zo muri ibyo bihugu akenshi ari izifite ubucuruzi bukiri mu ntangiriro, butarengeje 100,000 by'amadolari y'Amerika (miliyoni 109Frw).

Nubwo nta mishinga kuri ubu TFO ikorana n'abacuruzi bo mu Rwanda no mu Burundi, Musafiri avuga ko uyu muryango uha amahugurwa abashinzwe ubucuruzi muri za ambasade zabyo muri Canada, "tuberekera uburyo ki bashobora gufasha abantu bava mu bihugu byabo".

Ku mucuruzi uri mu Rwanda no mu Burundi, cyangwa muri Tanzania n'ahandi mu karere, Musafiri avuga ko ashobora gusura urubuga rwa internet rwa TFO akiyandikisha, buri kwezi akajya abona amakuru ajyanye no kohereza ibicuruzwa mu mahanga.