Al-Ittihad ya N'Golo Kante na Fabinho yanse gukina muri Irani kubera igishusho
Ahavuye isanamu, al-ittihad
Urukino rw’ihiganwa rihuza imirwi yabaye iya mbere ku mugabane wa Aziya rwari guhuza Al-Ittihad ya Arabia Sawudite hamwe na Sepahan ya Irani rwaraye ruhagaritswe nijoro ku wa mbere inyuma y’aho Al-Ittihad yankiye kwinjira mu kibuga.
Uno murwi wo muri Arabia Sawudite usanzwe umenyerezwa na Nuno Espirito Santo yahoze amenyereza Wolves na Tottenham, urimwo ibihangange N'Golo Kante na Fabinho, wanse kuja mu kibuga kubera batishimiye igishusho c’uwahoze ari intwazangabo ya Irani yo ku rwego rwa Jenerali cashizwe ku bwinjiriro bw’ikibuga.
Abafana baharurwa mu 60.000 nibo bari barindiranye igishika uru rukino rwari rutegekanijwe ku kibuga Naghsh-e Jahn ca Isfahan muri Irani.
Icuka kibi hagati ya Iran na Arabia Sawudite gisigura ko inkino hagati y’imirwi iva muri ibi bihugu vyompi zamye zibera ku butaka butegamiye uruhande na rumwe kuva mu 2016 kubera impungenge z’umutekano.
Ishirahamwe ry’umupira w’amaguru ku mugabane wa Aziya (Asian Football Confederation, AFC) rivuga ko uru rukino “rwahagaritswe kubera ibibazo bitari vyitezwe kandi vyashitse giturumbuka”.
Mw’itangazo, iri shirahamwe rivuga riti: "AFC yongeye kwiyemeza kwubahiriza umutekano w’abakinyi, abahagarikizi, abarorerezi n’abandi bose babifisemwo uruhara.
"Iki kibazo kizoshikirizwa inzego zibijejwe”.
Iki gishusho ni ic’intwazangabo y’igisirikare ca Irani Qasem Soleimani. Yagandaguwe mu gitero Reta Zunze Ubumwe za Amerika zakoze hafi y’ikibuga c’indege c’i Baghdad zikoresheje indege itagira umudereva (drone) muri Nzero (1) 2020.
Mu 2018, Arabia Sawudite yise Soleimani n’izindi ntwazangabo nkuru nkuru za Quds Force, ishami ry’ingabo zidasanzwe ry’igisirikare ca Irani gihagarariye impinduka za Irani - ikizwi nka Corps des Gardiens de la Révolution Islamique/Islamic Revolutionary Guards Corps - nk’abakora iterabwoba.
Abanya-Arabia Sawudite bafata Soleimani ko ari we yari ahagarariye ibikorwa vya Irani mu karere bakamwagiriza ibitero ku mato yaca mu kigobe c’Abarabu, ku bigo vy’igitoro vyari ku butaka bwa Arabia Sawudite kandi ko yari ashigikiye inyeshamba z’aba-Houthi muri Yemen bakora ibitero ku bisagara vya Arabia Sawudite. Irani yarahakana ibi birego.
Muri uno mwaka w’inkino, imirwi y’umupira w’amaguru ya Arabia Sawudite yarashoboye gusubira muri Irani ku ncuro ya mbere kuva mu 2016, igihe umurwi w’intagondwa za Irani wari uzwi kw’izina rya Basij – ryari igice ca Revolutionary Guard Corps – watera ibiro vy’ubuserukizi bwa Arabia Sawudite i Tehran, umugwa mukuru wa Irani.
Inyuma y’aho, imirwi y’inkino zo muri Arabia Sawudite yaciye ihagarika ingendo zo muri Irani mu nkino mpuzamakungu izo ari zo zose, ivuga ko yari ifise impungenge ku mutekano wayo.
Umurwi Al-Nassr wa Cristiano Ronaldo ni wo wabaye uwa mbere wo muri Arabia Sawudite kuja gukinira Irani muri uno mwaka w’inkino aho watsinze Persepolis mu kwezi guheze, mu rukino rw’ihiganwa rihuza imirwi yabaye iya mbere muri Aziya.
