Gukurikirana telefone byagaragaje uko abacanshuro bo muri Colombia bafashije RSF gufata umujyi muri Sudan

Raporo nshya ivuga ko amatsinda y'abacanshuro bava muri Colombia bafashijwe na Emira Zunze Ubumwe z'Abarabu (UAE), bahaye ubufasha bukomeye abarwanyi b'umutwe wa Rapid Support Forces (RSF) mu gufata umujyi wa el-Fasher mu burengerazuba bwa Sudan umwaka ushize.

Iperereza ryakozwe n'ikigo gisesengura ibijyanye n'umutekano, Conflict Insights Group (CIG), ryifashishije amakuru yakuwe mu gukurikirana telefone ngendanwa z'abo barwanyi b'Abanya Colombia.

UAE imaze igihe ihakana ko ishyigikira RSF, iri mu ntambara imaze imyaka itatu n'ingabo za leta Sudan.

Gufatwa kwa el-Fasher byabaye kimwe hakozwe ubugome bukomeye kurusha ubundi muri iyi ntambara, yateje ikibazo gikomeye cy'ubutabazi ku isi, aho abantu ibihumbi n'ibihumbi bishwe, abandi za miliyoni bagahunga ingo zabo.

Ikigo CIG kimaze igihe gikurikirana ibimenyetso by'uko UAE ifasha cyane mu bya gisirikare RSF, ariko umukuru wa kiriya kigo Justin Lynch avuga ko "ubu ari bwo bushakashatsi bwa mbere bushobora kugaragaza neza uruhare rwa UAE".

Yagize ati: "Turimo gushyira ahagaragara ibyo guverinoma zimaze igihe zizi ko hari isano itaziguye hagati ya Abu Dhabi na RSF."

Akomeza avuga ko iyi raporo yabo yasohotse uyu munsi "igaragaza uko abacanshuro bakoresha za drones zavaga ku birindiro muri UAE zikerekeza muri Sudan mbere y'uko RSF ifata umujyi wa el-Fasher."

Yongeyeho ati: "Abacanshuro bakoreshaga drones bise Internet yabo ya Wi-Fi izina rya 'unit' yabo - rifitanye isano n'ikigo gikorera muri UAE."

Perezida wa Colombia Gustavo Petro yasubiwemo mu mwaka ushize avuga ko abo bacanshuro ari "imyuka y'urupfu" kandi ko uburyo batwarwamo ari nk'"ubucuruzi bw'abantu".

BBC yasabye leta ya UAE kugira icyo ivuga ku byagaragajwe muri iyi raporo nshya.

UAE mbere yigeze gusohora amatangazo ihakana ibyo yise "ibirego by'ibinyoma bidafite ishingiro" ko ishyigikira RSF, inamagana "mu magambo akomeye cyane" ubwicanyi bwakorewe i el-Fasher.

Abasesenguzi bemera ko ubufasha buturuka hanze ku mpande zombi bwagize uruhare rukomeye mu gukomeza no kwagura intambara y'imbere muri Sudan.

CIG ivuga ko yakoresheje ikoranabuhanga riboneka ku isoko, risanzwe rikoreshwa mu kwamamariza umuntu ku giti cye, kugira ngo ikurikirane telefone zirenga 50 muri Sudan hagati ya Mata (4) 2025 na Mutarama(1) uyu mwaka, aho abazikoresheje bari abacanshuro b'Abanya Colombia, harimo no mu bice RSF igenzura aho drones zarasirwaga.

Yanifashishije amakuru yo gukurikirana ingendo z'indege, amashusho ya satelite, amashusho yo ku mbuga nkoranyambaga, inkuru z'itangazamakuru n'inyandiko z'ubushakashatsi mu gushyigikira isesengura ryayo.

Raporo yabo ivuga ko amakuru yakusanyije agaragaza inzira y'uruhererekane yerekana uko abo bacanshuro banyuze ahantu hatandukanye ho mu karere hategurirwaga ibyo bikorwa, cyane cyane ku kigo cy'imyitozo ya gisirikare cya UAE giherereye i Ghayathi muri Abu Dhabi.

Yakurikiranye telefone imwe iva muri Colombia igera ku kibuga cy'indege cya Zayad International Airport muri Abu Dhabi, aho yanabonye izindi enye(4) zari ziri mu rurimi rw'Icyesipanyolo ruvugwa muri Colombia.

Ebyiri (2) muri izo telefone nyuma zagiye muri leta ya Darfur y'amajyepfo muri Sudan, indi ijya mu mujyi wa Nyala ufatwa nk'umurwa mukuru wa RSF, aho zinjiye ku miyoboro ya Ei-Fi yiswe "ANTIAEREO" (bisobanura "kurwanya indege" mu Cyesipanyolo) na "AirDefense".

Raporo ivuga ko Nyala ari ihuriro rikomeye ry'abacanshuro b'Abanya Colombia n'ibikorwa bya drones bya RSF. CIG yabaruye ibikorwa byinshi bya drones byakorewe aho, inagaragaza ibikoresho birenga 40 bikoresha ururimi rw'Icyesipanyolo.

Mu kindi gikorwa, CIG yakurikiranye telefone imwe iva muri Colombia igera i Nyala, hanyuma ijya i el-Fasher mu majyaruguru ya Darfur, mu gihe cy'Ukwakira (10) gushize ubwo RSF yafataga uwo mujyi nyuma y'amezi 18 iwugose.

Iri muri el-Fasher, iyo telefone yinjiye ku muyoboro wa wi-fi witwa "ATACADOR" (bisobanura "ukora igitero"). Raporo ivuga ko CIG yasanze n'ibindi bikoresho bifitanye isano n'abacanshuro b'Abanya Colombia byari bihari mu gihe RSF yafataga uwo mujyi.

Ifatwa ry'umujyi ryakurikiwe n'ubwicanyi bukomeye bufatwa nk'ibyaha by'intambara n'ibyaha byibasiye inyokomuntu nk'uko byavuzwe n'umushinjacyaha w'Urukiko Mpuzamahanga Mpanabyaha (ICC), ndetse n'abashakashatsi ba ONU babisobanuye nk'ibifite "ibimenyetso bya jenoside".

Raporo igira iti: "CIG isanga urusobe rwa UAE n'abacanshuro b' abanya-Colombia rufite uruhare rugaragara muri ibi byabaye."

Justin Lynch yongeyeho ati: "Urwego rw'ubwicanyi bwabaye i el-Fasher ntirwashobokaga hatabayeho ibikorwa bya drones byakozwe n'abo bacanshuro," anagaragaza ibimenyetso by'uko banashyigikiye igikorwa cyo kugota uwo mujyi.

Iyo raporo nshya ivuga ko abo bacanshuro bakoraga mu itsinda ryitwa Desert Wolves, bakaba barakoraga nk'abatwara za drones, abarasa ibisasu bya rutura, no gutoza.

Umwe muri bo yigeze kwinjira ku miyoboro ya wi-fi yitwa "DRONES" na "LOBOS DEL DESIERTO" (bisobanura "Impyisi zo mu butayu"), mu gihe yakoraga akoresheje ururimi rw'Icyesipanyolo.

Nk'uko urubuga rw'amakuru rwo muri Colombia La Silla Vacía rubivuga, iri tsinda riyobowe na Coloneli Alvaro Quijano wahoze mu gisirikare cya Colombia.

Ubu abarizwa mu gihugu cya UAE kandi yafatiwe ibihano n'ibihugu bya Amerika n'Ubwongereza kubera kujyana Abanya-Colombia kujya kurwana muri Sudan.

Nk'uko La Silla Vacía n'inyandiko zabonetse na CIG zibivuga, abo ba Desert Wolves bahembwaga kandi bagakoreshwa n'ikigo gifite icyicaro muri UAE gifitanye isano n'abayobozi bakuru ba leta y'icyo gihugu.

CIG ivuga kandi ko yasanze ibikoresho bikoresha ururimi rw'Icyesipanyolo ku cyambu cyo muri Somalia bifitanye isano na UAE, ndetse no mu mujyi wo mu majyepfo y'iburasirazuba bwa Libya ukekwaho kuba ihuriro ry'ibikoresho by'intambara bijyanwa kuri RSF, bikekwa ko byoroherezwa na UAE.

Umubare w'abacanshuro b'Abanya Colombia muri Sudan wari usanzwe ubarirwa mu magana make.

Amerika yafatiye ibihano Abanya Colombia n'ibigo bifitanye isano na bo inshuro ebyiri, mu Ukuboza (12) no mu cyumweru gishize, kubera gushishikariza abantu kujya kurwana muri Sudan.

Minisiteri y'imari ya Amerika yavuze ko abarwanyi b'Abanya Colombia bafashije RSF gufata el-Fasher, ariko ntiyigeze ihamya isano itaziguye bafitanye na UAE.