Uruganda runini ku isi mu gukora udukingirizo rugiye kuzamura ibiciro kubera intambara ya Iran

Umkuru w'uruganda runini ku isi rukora udukingirizo, Karex, yavuze ko ruzazamura ibiciro byarwo kugera kuri 30% cyangwa hejuru yaho, niba intambara ya Iran ikomeje guhungabanya itangwa ry'ibikoresho by'ibanze bikenerwa mu gukora udukingirizo.

Goh Miah Kiat ukuriye Karex yabwiye ibitangazamakuru ko ikuguzi cyo gukora udukingirizo cyazamutse cyane kuva intambara yatangira.

Iyi sosiyete ikorera muri Malaysia ikora udukingirizo turenga miliyari eshanu ku mwaka, ikanagemurira inganda zikomeye ku isi nka Durex na Trojan, ndetse no ku bigo by'ibihugu byita ku buzima.

Kugeza ibiroro ku masoko atandukanye ku isi byarahungabanye cyane kuva Iran yafunga umuhora wa Hormuz mu kwibasira amato awunyuramo mu kwihimura ku bitero bya Amerika na Israel.

Hafi kimwe cya gatanu cy'ibitoro bigurishwa ku isi ndetse na gaze (LNG), hamwe n'ibindi bikomoka kuri peteroli, bisanzwe binyura muri uwo muhora.

Karex ikoresha cyane cyane ibiva ku gutunganya ibitoro - birimo ammonia ikoreshwa mu kubungabunga latex, ndetse n'amavuta ashingiye kuri silicone akoreshwa mu koroshya udukingirizo.

Goh yavuze ko muri uyu mwaka, udukingirizo dukenerwa twiyongereyeho hafi 30%, kandi ko izamuka ry'ibiciro by'ubwikorezi no gutinda kw'ingendo zo mu nyanja byarushijeho gutuma biriya bya nkenerwa bibura.

Yabwiye Bloomberg ati: "Mu bihe bibi, gukoresha udukingirizo birushaho kuba ngombwa kuko uba utazi neza ejo hazaza hawe, niba uzaba ugifite akazi umwaka utaha."

"Niba ubyaye umwana ubu, uzaba wongeyeho undi muntu wo gutunga."

Izamuka ry'ibiciro by'udukingirizo rigaragaza uburyo intambara ya Amerika na Israel na Iran, yamaze guhungabanya amasoko y'ingufu ku isi, inazamura ibiciro by'ibindi bicuruzwa ku baguzi.

Iyi ntambara yanateje izamuka ry'ibiciro by'amatike y'indege, aho amatike ahendutse mu cyiciro cya 'economy' yazamutse ku kigereranyo cya 24% ugereranyije n'umwaka ushize, nk'uko ubushakashatsi bushya bubivuga.

Hagati aho, ihungabana mu bwikorezi bw'ibicuruzwa binyuze mu kigobe cy'Abarabu ryatumye ibiciro by'ifumbire bizamuka, ndetse habaho ibura rya helium ikoreshwa mu gukora utwuma twa mudasobwa (chips).

Inganda zikora amazi yo kunywa na zo ziri guhura n'igitutu, kubera ko ababikora babuze ibikoresho by'ibanze.

Mu ntangiriro z'uku kwezi, Umuryango w'Abibumbye (UN) waburiye ko ibiciro by'isukari, ibikomoka ku mata n'imbuto bizazamuka bitewe n'izamuka ry'ibiciro by'ubwikorezi.

Ku wa Gatatu, uko ibiganiro by'amahoro hagati ya Amerika na Iran bihagaze ntibyari byumvikana neza, nyuma y'uko Perezida Donald Trump avuze ko azongerera igihe cy'agahenge hagati y'ibihugu byombi kugeza igihe ibiganiro bizakomereza.