Umufatanyacyaha muri dosiye ya Epstein yanze guha amakuru inteko ya Amerika adahawe imbabazi na Perezida

Ghislaine Maxwell, umugore ufungiye ubufatanyacyaha na Jeffrey Epstein, yanze gusubiza ibibazo by'Itsinda rishinzwe igenzura mu nteko ishinga amategeko ya Leta Zunze Ubumwe za Amerika.

Maxwell, wahamijwe ibyaha byo guhohotera no gushora abangavu mu busambanyi, yitabiriye ikiganiro cyabereye mu muhezo kuri uyu wa mbere hifashishijwe ikoranabuhanga, muri gereza yo muri Texas aho arimo kurangiriza igihano cy'imyaka 20 yakatiwe.

Umuyobozi w'Itsinda rishinzwe Igenzura, James Comer, ukomoka mu ishyaka ry'Abarepubulikani, yavuze ko Maxwell "nk'uko byari byitezwe", yahisemo kwitabaza ingingo ya gatanu yo mu itegeko nshinga rya Amerika (Fifth Amendment), imwemerera kudatanga amakuru mu gihe abona ko ashobora kumuteza ibibazo.

Yagize ati: "Birababaje kandi biteye impungenge."

Yongeraho ati: "Hari byinshi twari dukeneye kumubaza ku byaha we na Epstein bakoreye hamwe, ndetse n'amakuru arebana n'abandi bashobora kuba barafatanyije muri ibyo byaha.

Turashaka kugeza ukuri ku banyamerika no kubona ubutabera ku barokotse, ibyo ni byo iri perereza rigamije."

Ingingo ya Gatanu y'Itegeko Nshinga rya Leta Zunze Ubumwe za Amerika iha Abanyamerika uburenganzira bwo kwanga gusubiza ibyo babazwa mu igihe ibisubizo batanga bishobora kubateza ibindi bibazo.

Umudepite w'aba Demokarate Melanie Stansbury yabwiye itangazamakuru nyuma y'iperereza ko Maxwell "yakoresheje ayo mahirwe mu gusaba imbabazo z'ibyaha byamuhamijwe."

Comer yavuze ko, bishingiye ku biganiro bagiranye n'abarokotse ibikorwa bya Epstein, Maxwell yari 'umuntu mubi cyane' utagomba guhabwa ubwoko ubwo ari bwo bwose bw'imbabazi n'ubudahangarwa.

Mu butumwa yashyize ku mbuga nkoranyambaga mbere yaho, umwunganizi wa Maxwell David Oscar Markus yavuze ko Maxwell "yiteguye kuvuga byose mu kuri kandi mu buryo bwuzuye naramuka ahawe imbabazi na Perezida Trump."

yunzemo ati: "Ni we wenyine ushobora gutanga inkuru yuzuye. Hari abashobora kutabishima, ariko ukuri kurakenewe."

Mu ibaruwa yoherejwe ku Nteko Ishinga Amategeko, muri Komite ishinzwe Ubugenzuzi, mbere y'itangwa ry'ubuhamya rya Maxwell, itsinda ry'abarokotse ibikorwa bya Epstein ryasabye abanyamategeko kudahita bemera nta gushidikanya amakuru yose Maxwell azatanga.

Banenze Maxwell ko yanze gutunga agatoki "abagabo benshi b'ibitinyiro" bagize uruhare mu bikorwa byo gucuruza no gutwara abana ba Epstein, ndetse no kwanga gukorana mu buryo bufatika n'abashinzwe umutekano.

Bavuze ko ubuvugizi budasanzwe cyangwa ikizere cyihariye cyahabwa ubuhamya bwe byaba akarengane n'iyicarubozo ku barokotse.

White House yatangaje mbere ko "nta mbabazi cyangwa impuhwe na nke bateganya kugirira cyangwa gutekerezaho ku bijyanye na Maxwell."

Maxwell yakatiwe mu 2021 ku ruhare yagize mu gushuka abangavu ngo bagirirwe nabi na Epstein, wahoze ari umukunzi we. Epstein yapfiriye muri gereza mu 2019. Maxwell ubu ari gusaba imbabazi za Perezida Trump, kandi aregwa ko yabeshye abategetsi ba leta.

Mu yindi baruwa yohererejwe Comer mbere y'isesengura ry'amagambo ye, umudepite wo mu ishyaka rya Demokarate Ro Khanna yatangaje ko yari agiye kubaza Maxwell ku nyandiko y'ubucamanza yatanze umwaka ushize ivuga ko hari "abandi bantu bane bavuzwe mu rubanza nk'abafatanyacyaha" ndetse n'abandi 25 batigeze bashinjwa mu iperereza kuri Epstein.

Donald Trump yahakanye inshuro nyinshi ko nta kosa na rimwe yakoze mu bimurega bijyanye na Epstein, kandi avuga ko bahagaritse kuvugana imyaka amagana ishize. Nta n'ubwo yigeze ashinjwa icyaha na kimwe n'abahohotewe na Epstein.

Khanna yavuze ko icyemezo cya Maxwell cyo kwanga gusubiza ibibazo by'Inama Ishinzwe Igenzura (Oversight Committee) "gisa n'aho kinyuranye n'imyitwarire ye yabanje, kuko atigeze akoresha uburenganzira bwo kutavuga ibimushinja (Fifth Amendment) ubwo yahuraga n'Umunyamabanga wa Leta ushinzwe Ubushinjacyaha, Todd Blanche, bakaganira ku ngingo ziganisha kuri iyi ngingo."

Nk'uko bigaragara mu nyandiko ya Minisiteri y'Ubutabera y'uko byagenze mu biganiro byabaye mu kwezi kwa Nyakanga, Maxwell yabwiye Blanche wabaye umwunganizi wihariye wa Trump ko atigeze abona Trump cyangwa na Bill Clinton, bakora ibidakwiye. Yanavuze ko n'urutonde rw'abakiriya ba Epstein ruvugwa ko ruhari ntaho ruhuriye n'ukuri.

Ibyo kubazwa byari biteganyijwe kuba muri Kanama umwaka ushize, ariko Comer aza kubisubika nyuma y'icyifuzo cy'abanyamategeko ba Maxwell cyo gutegereza umwanzuro w'Urukiko rw'Ikirenga ujyanye n'urubanza rwe.

Ibyo biganiro bije mu gihe Minisiteri y'Ubutabera ya Leta Zunze Ubumwe za Amerika yashyize ahagaragara impapuro nshya miliyoni zirenga eshatu zivuga kuri dosiye ya Epstein, nyuma y'uko itegeko rishyiraho ko zigomba gutangazwa ryemejwe na Kongere umwaka ushize.

Abagize Kongere bemerewe kureba kopi zose uko zakabaye ntacyo zihinduweho, kuva kuri uyu wa Mbere, nk'uko CBS umufatanyabikorwa wa BBC muri Amerika yabitangaje.

Comer yunzemo ati: "Ndabona ari byiza ko Minisiteri y'Ubutabera yemereye abagize Kongere kuza kureba inyandiko zose zitagize amakuru n'amwe zivanwamo kabone n'ubwo yaba ateye ubwoba cyangwa ari ibanga rikomeye."

Itsinda ry'abarokotse ihohoterwa rya Epstein ryasohoye amashusho ku Cyumweru risaba ko habaho umucyo kurushaho ku bitaravuzwe ndetse no ku nyandiko zimwe zitarasohoka.

Blanche yahakanye ibyo kwitwa ko hari ibyo bahishe, avuga ko ibivugwa ko "hari amakuru ahishe ku bagabo bazwi" Minisiteri y'Ubutabera yanze gukurikirana, nta shingiro bifite.