Ku rugo rwa Rihanna humvikanye amasasu

Ku rugo rwa Rihanna ruri mu gace ka Beverly Hills muri California humvikanye urusaku rw'imbunda, nk'uko polisi ibitangaza.

Abapolisi muri Los Angeles batabajwe nyuma yo kurasa kwabaye ahagana saa 13:15 ku isaha yaho (saa 23:15 i Gitega na Kigali) ku cyumweru. Umuntu ukekwa yafashwe arafungwa.

Umwe mu bapolisi yabwiye CBS News ikorana na BBC muri Amerika, ko urugo rwibasiwe ari urwa Rihanna kandi hafatiwe imbunda.

Nta muntu wakomerekeye mu byabaye. Rihanna yari ahari ubwo ibyo byabaga, nk'uko bivugwa n'ikinyamakuru Los Angeles Times.

Polisi ivuga ko ukekwa, ari umugore uri mu myaka 30, wahagaze imbere y'urwo rugo ari mu modoka maze akarasa amasasu arindwi mbere yo kwanduruka yihuta.

Imodoka ye yaje gufatirwa muri 12Km uvuye ku rugo rw'uriya muhanzi, maze uwo mugore arafungwa. Ntabwo umwirondoro we uratangazwa.

Muri Nzeri(9) ishize Rihanna yabyaye umwana we wa gatatu, umukobwa, we n'umukunzi we A$AP Rocky.

Aba bombi, ubusanzwe bafitanye abandi bahungu babiri Riot and RZA.

Mu 2025, A$AP Rocky yahamwe n'icyaha cyo kurashisha imbunda ari ku rugo rw'uwahoze ari inshuti ye, mu rubanza Rihanna yitabiriye ari kumwe n'abahungu be babiri.

Rihanna wavukiye mu birwa bya Barbados, amzina ye nyakuri ni Robyn Fenty, yamamaye kuva mu myaka ya 2000 bivuye ku ndirimbo ze nka Pon de Replay na Umbrella

Aherutse kwizihiza imyaka 20 mu muziki ahereye igihe yasohoreye album ye ya mbere.

Uretse umuziki, Rihanna yinjiye mu bushabitsi butandukanye, burimo ubucuruzi bw'ibikoresho by'ubwiza buzwi nka Fenty Beauty hamwe na kompanyi ikora utwenda tw'imbere tw'abagore.

Ubu, umutungo w'iki cyamamare cy'imyaka 37 Forbes ivuga ko uri hejuru ya miliyari y'amadolari ya Amerika

BBC yasabye abahagarariye Rihanna kugira icyo bavuga ku byabaye iwe, ntibarasubiza.