Umushinwa yahamwe n'icyaha nyuma y'icukumbura rya BBC muri videwo z'ivanguramoko

Urukiko rwo muri Malawi rwahamije Umushinwa ibyaha byinshi birimo kugurisha mu buryo butemewe n'amategeko no gushishikariza abana kujya mu myidagaduro.

Lu Ke, unazwi nka Susu, yakatiwe igifungo cy'amezi 12, igifungo yamaze kurangiza aho yari afungiye muri kasho ya polisi.

Yategetswe kuva muri icyo gihugu mu gihe kitarenze iminsi irindwi ndetse abuzwa kuzongera kuhagaruka ukundi.

Yatawe muri yombi mu mwaka ushize nyuma y'inkuru y'ubucukumbuzi y'ishami rya BBC Africa Eye.

Iyo nkuru yamwerekanye arimo gufata amashusho abana b'Abanya-Malawi muri videwo zo gusuhuzanya, zimwe zari zirimo n'amagambo y'ivanguramoko.

Izo videwo zagurishwaga ku giciro kigera ku madolari 70 y'Amerika (82,000Frw) ku mbuga nkoranyambaga zo mu Bushinwa no ku mbuga za internet.

Ubwo inkuru ya videwo ze ziteye ishozi yamenyekanaga, yahungiye mu gihugu cya Zambia gituranye na Malawi, mu gihe abategetsi bo muri Malawi bari bamaze gusohora inyandiko yo kumuta muri yombi.

Yaje gufatwa ndetse ahamwa no kwinjira mu gihugu mu buryo bunyuranyije n'amategeko, nuko yoherezwa muri Malawi.

Yangiwe gufungurwa by'agateganyo atanze ingwate, ndetse yari amaze iki gihe ari muri kasho ya polisi kugeza ubwo urukiko rwamukatiraga ku wa kane.

Yarezwe ibyaha 14, birimo kwakira abana bo gukoresha mu myidagaduro, gucuruza abana, gukoresha internet mu buryo bunyuranyije n'amategeko hamwe n'ibikorwa biteje ibyago ku mibereho.

Lu Ke yahakanye gukora videwo zisebanya.

Mu kwiregura kwe, urukiko rwabwiwe ko yari yaramaze kwishyura leta miliyoni 16 z'ama-kwacha yo muri Malawi (miliyoni 18Frw) y'indishyi ku bo yakoreye ibyo ndetse no ku bikorwa by'inshingano mu mibereho y'abantu.

Yavuze ko yari yakoze izo videwo mu rwego rwo gukwirakwiza umuco w'Ubushinwa mu baturage bo muri Malawi.