Uganda: Umugabo uregwa ubutinganyi ashobora guhabwa igihano cy'urupfu

Umugabo wo muri Uganda w'imyaka 20 ashobora gukatirwa igihano cy'urupfu nyuma yuko arezwe ubutinganyi bukaze, buhanishwa igihano cy'urupfu, nkuko biri mu itegeko ryateje impaka rihana ubutinganyi ryemejwe mu kwezi kwa Gicurasi (5) uyu mwaka.

Ni bwo bwa mbere ikirego nk'icyo gitangajwe, nubwo bitazwi niba mbere yaho hari abandi bagejejwe mu nkiko kuri icyo kirego.

Ku itariki ya 18 y'uku kwezi kwa Kanama (8), urukiko rwo mu burasirazuba bwa Uganda ryashyizeho ikirego kuri uwo mugabo, nyuma y'ibirego ko yakoranye imibonano mbuzabitsina n'umugabo w'imyaka 41.

Ariko ibiro ntaramakuru Reuters byatangaje ko bitazwi impamvu icyo cyaha aregwa gifatwa ko kiri mu cyiciro cy'"ubutinganyi bukaze".

Bijyanye n'iryo tegeko, icyiciro cy'ubutiganyi "bukaze", kirimo nk'imibonano y'ab'igitsina kimwe irimo umuntu w'imyaka itageze kuri 18 cyangwa imibonano aho umuntu yanduriyemo indwara y'ubuzima bwose nka virusi ya VIH/HIV itera SIDA.

Justine Balya, wunganira mu mategeko uwo uregwa, yabwiye Reuters ko Uganda yareze abandi bantu bane bijyanye n'itegeko rihana ubutinganyi, ariko ko umukiliya we ari we wa mbere urezwe muri iki cyiciro giteganya igihano.

Ku itariki ya 22 y'uku kwezi kwa Kanama, urukiko rwo muri Uganda rwareze ubutinganyi uwahoze ari impirimbanyi iharanira uburenganzira bw'abatinganyi n'undi mugabo, nkuko byatangajwe n'ikinyamakuru Daily Monitor cyo muri Uganda.

Mu cyumweru gishize, urundi rukiko rwo muri Uganda rwareze umugore w'imyaka 26 ubucuruzi bw'abantu n'ibirego bitatu by'ubutinganyi.

Mbere yaho muri uku kwezi, banki y'isi yavuze ko ibaye ihagaritse inguzanyo nshya kuri Uganda, ivuga ko itegeko rihana abatinganyi rinyuranyije n'indangagaciro shingiro zayo.