Sénégal yahagaritse cyamunara mu Bufaransa y'imitako ya Senghor

Cyamunara mu Bufaransa y'ibikoresho by'uwabaye Perezida wa mbere wa Sénégal yatindijwe, mu gihe ubutegetsi bw'i Dakar buri mu biganiro byuko bwahita bwigurira ibyo bikoresho.

Ibyo bikoresho bya Léopold Sédar Senghor – birimo imidali ya gisirikare n'imitako – byari byitezwe kugurishirizwa mu mujyi wa Caen, mu majyaruguru ashyira uburengerazuba bw'Ubufaransa.

Perezida wa Sénégal muri iki gihe, Macky Sall, yashishikarije minisitiri w'umuco n'ambasade ya Sénégal i Paris, kugirana ibiganiro n'abateguye cyamunara.

Senghor yategetse Sénégal imyaka 20, nyuma yuko ibonye ubwigenge mu 1960 ku Bufaransa byayikolonizaga.

Yabaye n'umusizi (poète) ukomeye cyane n'umwanditsi, watangije inkubiri y'ubuvanganzo (courant littéraire) yiswe Négritude, yarwanyaga ubukoloni ndetse igateza imbere imico nyafurika, afatanyije n'Umunya-Martinique Aimé Cesairé, ubwo Senghor yigaga i Paris mu myaka ya za 30 (1930).

Muri politiki, Senghor yari afite amatwara ya gisosiyalisti. Yanakomeje kugirana umubano wa hafi n'Ubufaransa.

Mu kiruhuko cy'izabukuru yimukiye mu Bufaransa hamwe n'umugore we Colette w'Umufaransakazi, batura hafi y'i Caen, ari na ho Senghor yapfiriye mu mwaka wa 2001.

Ibyo bikoresho bya Senghor byazanywe muri cyamunara n'umucuruzi utegamiye kuri leta, utatangajwe izina.

Mu byumweru bicye biri imbere, ibiganiro ubu bigiye gukorwa hagati y'abategetsi bo ku rwego rwa za leta, nkuko Solène Laine ukoresha cyamunara yabibwiye ibiro ntaramakuru AFP ku wa gatandatu.

Ariko mu gihe ibyo biganiro nta masezerano byageraho, kompanyi ye ivuga ko iyo cyamunara ubwo yaba mu kwezi kw'Ukuboza (12) uyu mwaka.