Kenya: Abanyamahanga batatu bakorera akanama k'amatora bari bafunzwe barekuwe

Abanyamahanga batatu bakorera akanama k'amatora bari batawe muri yombi n'abategetsi ba Kenya nyuma yo kubasangana ibikoresho bikomeye by'amatora, barekuwe.

Mu itangazo, umuvugizi wa polisi ya Kenya, Bruno Shioso, yemeje ko abo bakozi bari batawe muri yombi kuko aka kanama katari kamenyesheje abashinzwe umutekano mbere yuko abo bakozi bagera mu gihugu.

Mbere yuko barekurwa, mu itangazo kuri Twitter aka kanama kazwi nka 'Independent Electoral and Boundaries Commission' (IEBC) kari kavuze ko abo bakozi b'abanyabiraka (badahoraho) bo mu kigo Smartmatic International BV batawe muri yombi ku kibuga mpuzamahanga cy'indege cyitiriwe Jomo Kenyatta i Nairobi, ubwo bari bahageze ku wa kane bavuye muri Venezuela.

Umuvugizi wa polisi yongeyeho ko bari bafunze abo bakozi banabakoraho iperereza nyuma yuko basanganywe udukoresho two kwiyomekaho (stickers) tujyanye n'amatora, tutari twamenyekanishijwe "nkuko bisabwa n'amategeko".

Yanavuze ko twari dutwawe mu muzigo usanzwe w'umuntu ku giti cye, nta n'umutegetsi wo mu kanama IEBC uduherekeje.

Ibikoresho byari byafatiriwe byasubijwe ako kanama nyuma yuko amaperereza agaragaje ko ari umutungo wako.

Ibi bibaye mu gihe hari abanyapolitiki bamwe bagaragaje impungenge zuko aka kanama k'amatora kadafite ubushobozi bwo gukoresha amatora anyuze mu mucyo no mu bwisanzure.