Zelensky avuga ko uzigarurira Severodonetsk ashobora kwegukana uburasirazuba

Perezida wa Ukraine Volodymyr Zelensky yavuze ko imirwano mu mujyi wa Severodonetsk ishobora kugena uzatsinda intambara mu burasirazuba bw'iki gihugu.

Mu gihe imirwano ikaze ikomeje muri ako karere k'inganda aho abasirikare ba Ukraine bahanganye n'abasirikare b'Uburusiya n'abarwanyi baharanira ubwigenge babashyigikiye, yagize ati:

"Mu buryo bwinshi, ikizaba kuri Donbas ni ho kiri gufatirwaho icyemezo".

Yavuze ko abasirikare b'igihugu cye barimo gutuma abasirikare b'umwanzi batakaza byinshi.

Ariko abasirikare ba Ukraine basubijwe inyuma n'abasirikare b'Uburusiya babageza mu nkengero z'uwo mujyi, nkuko umutegetsi wo hejuru w'ako karere abivuga.

Guverineri w'akarere ka Luhansk, Serhiy Haidai, yavuze ko abasirikare bo mu mutwe wihariye ba Ukraine basubiye inyuma, nyuma yuko Uburusiya "butangiye gukubura ngo hataboneka ubwihisho mu karere bukoresheje ibisasu n'ibitero by'indege".

Akarere ka Luhansk hamwe n'akarere bituranye ka Donetsk ni two tugize akarere ka Donbas.

Haidai yabwiye ibitangazamakuru byaho ati: "[Abasirikare] Abacu ubu nanone baragenzura gusa inkengero z'umujyi. Ariko imirwano irakomeje, abacu barimo kurwana kuri Severodonetsk".

Yongeyeho ati: "Ntibishoboka kuvuga ko Abarusiya bagenzura byuzuye umujyi".

Uyu guverineri yavuze ko abaturage b'abasivile bagera ku 15,000 bakiri mu mujyi wa Severodonetsk no mu mujyi bituranye wa Lysychansk.

Ku wa gatatu Uburusiya bwavuze ko Ukraine irimo "gutakaza cyane abasirikare, intwaro n'ibikoresho bya gisirikare" muri Donbas.

Mu mpera y'ukwezi kwa gatatu ni bwo abasirikare b'Uburusiya bibanze ku burasirazuba bwa Ukraine, nyuma yuko bavuye mu karere ko mu nkengero z'umurwa mukuru Kyiv.

Kuva imirwano yabanje yabaho mu 2014 kugeza mu 2015, ibice binini by'akarere ka Donbas bigenzurwa n'abarwanyi bashyigikiwe n'Uburusiya.

Mu yandi makuru, umunyamabanga mukuru w'umuryango w'abibumbye (ONU/UN) António Guterres yaburiye ko ingaruka ku isi z'igitero cy'Uburusiya kuri Ukraine zirimo kurushaho kuba mbi.

Yavuze ko ubu izo ngaruka zirimo kugera ku bantu miliyari 1.6.

Yagize ati: "Ingaruka y'intambara ku kwihaza mu biribwa, ibitoro n'imari irimo kugera hose, ni mbi cyane kandi irimo kongera umuvuduko".

Mu kiganiro na BBC, umukuru w'umuryango w'ubucuruzi ku isi (WTO/OMC) Ngozi Okonjo-Iweala yaburiye ko amakuba ajyanye n'ibiribwa ashobora kumara imyaka niba nta gikozwe.

Yavuze ko ibihugu byo muri Afurika bishobora kwibasirwa mu buryo bwihariye n'ubucye bw'ingano n'ifumbire.

Toni z'ibinyampeke zibarirwa muri za miliyoni ziracyari mu nzu z'ubuhunikiro no mu byambu (ibivuko mu Kirundi) byo muri Ukraine, aho zidashobora koherezwa mu mahanga kubera intambara.

Inzobere mu rwego rwa za banki ku isi zemeza ko ubukungu bw'Uburusiya buzagabanukaho 15% bitarenze mu mpera y'uyu mwaka.

Bukongera kugabanukaho 3% mu mwaka wa 2023 - kubera ibihano iki gihugu cyafatiwe n'uburengerazuba (Uburayi n'Amerika), kompanyi nyinshi zaretse kuhakorera hamwe no kubera igabanuka ry'ibyo bwohereza mu mahanga.

Ikigo cy'imari 'Institute of International Finance' cyaburiye ko iyo mibare ishobora no kuba mibi kurushaho ku Burusiya mu gihe Uburayi bwaba bushoboye kureka gukoresha ibitoro biva muri icyo gihugu.

Uburusiya bwateye Ukraine ku itariki ya 24 y'ukwezi kwa kabiri uyu mwaka, buvuga ko bushaka gukuraho igisirikare no "gukuraho aba Nazi" muri Ukraine - ibyo henshi abantu bavuze ko nta shingiro bifite.

Kuva intambara yatangira, ONU ivuga ko abasivile batari munsi ya 4,253 bishwe, naho abandi 5,141 barakomereka.

ONU kandi ivuga ko abarwanyi babarirwa mu bihumbi bo ku mpande zombi na bo bishwe, naho abandi bantu barenga miliyoni 14 bata ingo zabo.