DR Congo: M23 'yafashe Luke na Katobotobo muri Masisi'

Ku wa gatatu, umutwe wa M23 wafashe uduce twa Katobotobo na Luke muri teritwari ya Masisi muri Kivu ya Ruguru ya DR Congo nk'uko umwe mu bagize sosiyete sivile muri teritwari ya Masisi yabwiye BBC.

Ni nyuma y'imirwano yabaye ku wa mbere, ku wa kabiri no ku wa gatatu mu bice by'iburengerazuba bwa Masisi hagati ya M23 n'abarwanyi ba Wazalendo ubusanzwe bafashwa n'ingabo za leta.

BBC yagerageje kuvugisha M23 ntibyashoboka kugeza ubu.

Sosiyete sivile ivuga ko abantu benshi mu duce twa Osso Banyungu muri 'groupement' ya Nyamaboko, i Katoyi, Katobotobo n'ahandi bavuye mu byabo bagahunga kuva mu ntangiriro z'iki cyumweru.

Bimwe mu binyamakuru muri DR Congo byemeje ko uduce twa Katobotobo na Luke twafashwe na M23 ku wa gatatu.

Radio Okapi ivuga ko imirwano yo muri iki cyumweru yashyamiranyije M23 na Wazalendo bo mu gice cy'umutwe wa Résistants patriotes congolais (PARECO) gikuriwe n'uwitwa Mutayomba.

Hagati aho, mu ijoro ryo ku wa mbere rishyira ku wa kabiri muri 'groupement' ya Rusayo mu majyaruguru y'umujyi wa Goma humvikanye amasasu mu gihe cy'amasaha, bivugwa ko ari abarwanyi ba Wazalendo bari bateye uyu mujyi.

Nyuma, mu mashusho, umutwe wa Wazalendo CMC wavuze ko ari wo ibirindiro byawo muri Rusayo byari byatewe na M23 ukirwanaho. Ibyo BBC itashoboye kugenzura mu buryo bwigenga.

Imirwano hagati ya M23 na Wazalendo CMC kandi yabaye ku wa mbere no ku wa kabiri muri 'groupement' ya Bukombo, 'chefferie' ya Bwito muri teritwari ya Rutshuru muri iyi ntara ya Kivu ya Ruguru, na yo bivugwa ko yatumye benshi bata ingo zabo bagahunga.

'Guhagarika imirwano bihoraho'

Iyi mirwano ya hato na hato ikomeje kuvugwa nyuma y'uko M23 na leta ya Kinshasa bumvikanye 'guhagarika imirwano bihoraho' mu biganiro by'i Doha muri Qatar, mbere y'uko bagera ku masezerano y'amahoro ateganyijwe mu kwezi gutaha.

Kugeza ubu biragoye kwemeza uruhande rutangira gutera urundi kuko nyuma y'imirwano impande zombi kenshi buri rumwe rushinja urundi ko ari rwo rwayitangije.

Mu nyandiko y'ibyo bumvikanyeho impande zombi zasinye i Doha, harimo ko ziyemeje ko "uku guhagarika imirwano kureba abarwanyi bose bari mu makimbirane".

Impande zombi zumvikanye kandi "kwirinda igikorwa cyose cyabangamira intambwe yo kugera ku guhagarika imirwano" muri byo harimo kwirinda "gushaka gufata ku ngufu ibirindiro bishya ku butaka".

Abasesenguzi batandukanye bagiye bavuga ko gusinya amasezerano yo guhagarika imirwano ari intambwe ikomeye ariko iyo kuyashyira mu bikorwa ari yo ikomeye kurushaho.

Kimwe mu byo impande zombi zumvikanye cyitezweho umusaruro ni ishyirwaho ry'urwego rw'ubugenzuzi bugena ibigendanye n'uku guhagarika imirwano no gukurikirana ko byubahirizwa.

Biteganyijwe ko intumwa za M23 na leta ya Kinshasa zizasubira i Doha, mu biganiro biganisha ku kugera ku masezerano y'amahoro azasinywa bitarenze tariki 18 z'ukwezi gutaha kwa Kanama(8) 2025, nk'uko impande zombi zabyumvikanye mu nyandiko zasinye mu mpera z'icyumweru gishize i Doha.