Musk avuga ko yicuza bimwe mu byo yatangaje kuri Trump

Umuherwe Elon Musk utunze za miliyari z'amadolari yavuze ko yicuza bimwe mu byo yatangaje kuri Perezida w'Amerika Donald Trump igihe bari bari mu ntambara yo guterana amagambo ku mbuga nkoranyambaga.

Musk yanditse ku rubuga nkoranyambaga rwe X ati: "Byararengereye cyane."

Bombi barashyamiranye ku mugaragaro, nyuma yuko uwo muherwe nyiri kompanyi ya Tesla avuye mu kazi ke ko mu biro bya perezida w'Amerika ndetse akavuga ko umushinga w'itegeko ry'imisoro wa Trump ari "ishyano riteye ishozi".

Musk atangaje ibi nyuma yuko Trump, mu kiganiro n'ikinyamakuru the New York Post kuri uyu wa gatatu, avuze ko yiteguye ko hashobora kubaho ubwiyunge. Perezida yavuze ko yumvise atengushywe gacye kubera uko gushwana kwabo ariko avuga ko "nta byiyumvo bibi [nta nzika]" amufitiye.

Avuga ku rukurikirane rw'ubutumwa bukakaye cyane Musk yamutangajeho ku mbuga nkoranyambaga, Trump yagize ati: "Ndatekereza ko yumva ababajwe cyane no kuba yarabivuze."

Ingengo y'imari, irimo kugabanya imisoro cyane no kongera amafaranga leta ikoresha mu gisirikare, yemejwe mu kwezi gushize n'inteko ishingamategeko umutwe w'abadepite. Ubu irimo gusuzumwa n'abasenateri.

Musk, rwiyemezamirimo mu ikoranabuhanga, yashishikarije Abanyamerika guhamagara ababahagarariye i Washington kugira ngo "bice uwo mushinga w'itegeko" kuko yemezaga ko uzateza "ihungabana ry'ubukungu mu gice cya kabiri cy'uyu mwaka".

Nta gihamya atanze, uyu muherwe wa mbere ku isi yavuze ko Trump agaragara muri dosiye zitatangajwe za leta zijyanye na Jeffrey Epstein wari ukurikiranyweho ibyaha by'ihohotera rishingiye ku gitsina, wapfiriye muri kasho mu 2019. Ibiro bya perezida w'Amerika (White House) byapfobeje ibyo Musk yavuze.

Mu gusubiza icyo gihe, Trump yavuze ko Musk "yataye umutwe" ndetse akangisha gusesa amakontaro afitanye na leta, afite agaciro kagereranywa ko kagera kuri miliyari 38 z'amadolari y'Amerika.

Mu kiganiro yagiranye ku wa gatandatu na televiziyo NBC News yo muri Amerika, Trump yavuze ko Musk "yasuzuguye ibiro bya perezida".

Trump yagize ati: "Ntekereza ko ari ikintu kibi cyane, kuko arasuzugura cyane. Ntushobora gusuzugura ibiro bya perezida."

Bigaragara nkaho Musk yasibye ubutumwa bwinshi mu mpera y'icyumweru gishize, burimo n'ubwasabaga ko Trump yeguzwa.

Musk ni we wateye inkunga ya mbere nyinshi cyane – miliyoni hafi 250 z'amadolari – ibikorwa byo kwiyamamaza bya Trump mu matora ya perezida yo mu 2024 ndetse yafatwaga nk'umuntu wa hafi cyane ya Perezida.

Steve Bannon, wahoze ari umujyanama wa Trump, yasabye ko Musk, wavukiye muri Afurika y'Epfo, yirukanwa muri Amerika.

Visi Perezida w'Amerika JD Vance yavuze ko yizeye ko "amaherezo Elon aragaruka mu muryango" ariko ko bishobora kugorana kuko uwo muherwe yakoze ibintu bya "kirimbuzi".

Benshi mu bo mu ishyaka ry'abarepubulikani rya Trump basabye ko abo bagabo bombi biyunga. Mu gihe abo mu ishyaka ry'abademokarate bo bihereye ijisho ubwo bushyamirane.

Ugushwana kwabo kwabaye nyuma gato yuko Musk avuye mu rwego rushinzwe kunoza imikorere ya leta rwitwa DOGE (Department of Government Efficiency), yari amaze iminsi 129 akoramo.