Ababarirwa mu bihumbi muri Amerika bigaragambije bamagana Trump

Abantu babarirwa mu bihumbi bitabiriye imyigaragambyo muri Amerika ku wa gatandatu yo kwamagana ibikorwa Perezida Donald Trump aherutse gukora.

Iyi myigaragambyo izwi nka "50501", bishatse kuvuga "imyigaragambyo 50, leta 50, igikorwa 1". Yari iyo guhurirana n'isabukuru y'imyaka 250 ishize intambara y'impinduramatwara y'Amerika itangiye.

Iyo myigaragambyo yabereye mu bice bitandukanye birimo nko hanze y'ibiro bya perezida w'Amerika (White House), hanze y'inzu z'ubucuruzi za kompanyi Tesla y'umuherwe Elon Musk, uri mu butegetsi bw'Amerika nk'umwe mu bajyanama ba Trump, no mu yindi mijyi myinshi.

Abigaragambya binubiraga ibibazo bitandukanye. Benshi basabye ko Kilmar Ábrego García, woherejwe muri El Salvador habayeho kumwibeshyaho, asubizwa muri Amerika.

Imyigaragambyo ya politike irimo guhinduka ikintu kimenyerewe muri Amerika.

Imyigaragambyo yiswe 'Hands Off', cyangwa 'Sigaho', ugenekereje mu Kinyarwanda, yabaye mu ntangiriro y'uku kwezi kwa Mata (4), yitabiriwe n'abantu babarirwa mu bihumbi mu mijyi yo mu bice bitandukanye by'igihugu.

Ikusanyabitekerezo rya vuba aha cyane ry'ikigo Gallup ryumvikanisha ko 45% by'abatora ari bo bashyigikiye imikorere ya Trump muri aya mezi atatu abanza y'ubutegetsi bwe, iryo janisha rikaba riruta irya 41% bari bashyigikiye imikorere ye mu gihe nk'icyo cy'amezi atatu ya mbere yo kuri manda ye ya mbere.

Ariko icyo kigero kiri hasi ugereranyije n'impuzandengo ('moyenne') y'amezi atatu abanza iri kuri 60% ku baperezida bose b'Amerika batowe hagati y'umwaka wa 1952 n'uwa 2020.

Imyigaragambyo yo ku wa gatandatu yakomoje ku bikorwa bitandukanye bya Trump, birimo n'ibikorwa by'ikigo kizwi nka DOGE (mu mpine y'Icyongereza) kigamije kunoza imikorere ya leta hagabanywa abakozi n'amafaranga akoreshwa. Musk ni umwe mu bayobozi b'icyo kigo.

Abigaragambya kandi bamaganye kuba ubutegetsi bwa Trump budashaka gutuma Ábrego García, umuturage wa El Salvador, asubizwa muri Amerika.

Gihad Elgendy yabwiye igitangazamakuru CNN ko yitabiriye imyigaragambyo yo hanze ya White House mu rwego rwo kunenga iyirukanwa mu gihugu rya Ábrego García. Yemeza ko Trump "ashobora kotsa igitutu El Salvador mu buryo bumworoheye ikamugarura".

Amakuru avuga ko iyi myigaragambyo muri rusange yabaye mu mahoro, nubwo Depite Suhas Subramanyam, wo mu ishyaka ry'abademokarate ritavuga rumwe n'ubutegetsi, yatangaje videwo ku rubuga nkoranyambaga X igaragaza umugabo ufite icyapa kiriho Trump, uwo mugabo agenda abyigana mu mbaga kugira ngo agere kuri Depite ahangane na we, arakaye.

Abigaragambya benshi bari bafite ibyapa biriho amagambo avuga ngo "Nta Bami muri Amerika", ahuye n'isabukuru y'itangira ry'impinduramatwara y'iki gihugu cyakolonijwe n'Ubwongereza.

Gukundwa n'abaturage kwa Trump kugaragara ko kurimo kugabanuka, cyane cyane ku bijyanye n'ubukungu.

Ubwo yageraga ku butegetsi muri Mutarama (1) uyu mwaka, abaturage bamwemeraga ku kigero cya 47%, nkuko ikusanyabitekerezo ry'ikigo Gallup ribivuga.

Mu ikusanyabitekerezo riherutse gukorwa na Reuters/Ipsos, ikigero cye cyo kwemerwa n'abaturage na ho cyaragabanutse kiva kuri 47% cyari kiriho ku munsi yarahizwaga nka Perezida, kigera kuri 43%.

Muri iryo kusanyabitekerezo, abantu bangana na 37% ni bo bashyigikiye ibikorwa bye mu bukungu, mu gihe banganaga na 42% muri urwo rwego ubwo yarahizwaga.

Mu ntangiriro y'uku kwezi, abantu babarirwa mu bihumbi amagana muri Amerika bitabiriye imyigaragambyo yo ku rwego rw'igihugu yo kwamagana Trump, ya mbere yari irimo abantu benshi yari ibayeho kuva asubiye ku butegetsi.

Icyo gihe iyo myigaragambyo - yari yitabiriwe n'abantu benshi kurusha abitabiriye iyi yo ku wa gatandatu - yabereye ahantu 1,200 muri leta zose 50 zigize Amerika.