Komanda w'Uburusiya yiciwe mu mutego muri Mali mu muyaga wa serwakira

Umutwe w'abacanshuro b'Abarusiya wavuze ko komanda wo muri uwo mutwe yiciwe muri Mali, nyuma y'igitero cy'abarwanyi b'inyeshyamba cyabaye mu gihe hari hari umuyaga wa serwakira ukumunzura n'umucanga.

Ubutegetsi bwa gisirikare buriho muri icyo gihugu cyo muri Afurika y'uburengerazuba, mu 2021 bwari bwiyambaje umutwe w'abacanshuro wa Wagner, bushaka ko ubufasha mu kurwanya intagondwa zigendera ku mahame akaze yiyitirira idini ya Isilamu no kurwanya abaharanira kwigenga ku butegetsi bwa Mali.

Ku wa mbere, uwo mutwe w'Abarusiya - ubu wahindutse itsinda ryitwa Africa Corps - wavuze ko mu cyumweru gishize wifatanyije n'igisirikare cya Mali mu "ngamba zikaze" barwanyemo n'inyeshyamba ziharanira ubwigenge, n'intagondwa zigendera ku mahame akaze yiyitirira Isilamu.

Ariko abo barwanyi bagamije kwigenga ku butegetsi bwa Mali bagabye igitero kinini, bica abacanshuro bagereranywa ko bari hagati ya 20 na 50, nkuko abahaye amakuru BBC bari hafi ya Africa Corps babivuze.

Abatangaza amakuru ya gisirikare ku mbuga za internet benshi b'Abarusiya batangaje ko nibura 20 biciwe mu mutego hafi y'umujyi wa Tinzaouaten wo mu majyaruguru ashyira uburasirazuba bwa Mali.

Mu itangazo washyize ku rubuga rwa Telegram, uwo mutwe w'abacanshuro b'Abarusiya ntiwasobanuye umubare w'abarwanyi bawo bapfuye, ariko wemeje ko watakaje abantu. Abo barimo umukomanda, Sergei Shevchenko, wiciwe mu mirwano.

Mbere, iryo tangazo ryavuze ko abacanshuro bishe benshi mu barwanyi b'intagondwa bagendera ku mahame akaze yiyitirira Isilamu ndetse abasigaye bakwira imishwaro.

Iryo tangazo ryongeyeho riti: "Ariko, umuyaga wa serwakira wakurikiyeho urimo umucanga watumye abahezanguni bisuganya bongera umubare wabo ugera ku bantu 1,000."

Umutwe wa CSP-DPA (wahoze uzwi nka CSP-PSD) uharanira kwigenga, wiganjemo abo mu bwoko bw'aba Touareg, wigambye icyo gitero.

Umuvugizi wawo yasubiwemo n'ibiro ntaramakuru AFP agira ati: "Ku wa gatandatu, ingabo zacu zakubise bikomeye imirongo [y'abarwanyi] y'umwanzi."

Uwo muvugizi yongeyeho ko hari abo bafashe babagira imfungwa, ndetse ko "ibikoresho n'intwaro byinshi byangijwe cyangwa birafatwa".

Uwo mutwe w'inyeshyamba watangaje videwo igaragaza abagabo benshi b'abazungu bambaye gisirikare barambaraye batinyagambura mu kibaya kirimo umucanga.

Indi videwo igaragaza itsinda ryiganjemo abagabo b'abirabura bipfutse ibitambaro mu maso, amaboko yabo aboheye mu mugongo.

BBC ntiyashoboye kwemeza umwimerere w'izo videwo.

Umutwe wa JNIM, ukorana n'umutwe wa al-Qaeda, na wo wigambye ko ari wo wonyine wagabye icyo gitero.

Uwo mutwe w'intagondwa zigendera ku mahame akaze yiyitirira Isilamu wavuze ko wishe abacanshuro 50 b'Abarusiya mu "mutego w'urusobe".

Mu myaka irenga icumi ishize, leta ya Mali yatakaje igice kinini cy'amajyaruguru nyuma y'igitero cy'inyeshyamba z'aba Touareg. Izo nyeshyamba zafashe intwaro zisaba gushinga leta yigenga.

Umutekano w'icyo gihugu wahise urushaho kugorana kubera ko intagondwa zigendera ku mahame akaze yiyitirira Isilamu na zo zinjiye muri iyo ntambara.

Ubwo igisirikare cyafataga ubutegetsi mu 2020 no mu 2021 gihiritse ubwari buriho, cyavuze ko leta yari iriho yari yarananiwe gucyemura izi mvururu.

Agatsiko gashya ka gisirikare kari ku butegetsi muri Mali kacanye umubano wari umaze igihe kirekire iki gihugu cyari gifitanye n'Ubufaransa bwahoze bugikoloniza, bugirana umubano n'Uburusiya mu rwego rwo guhosha izi mvururu.

Ariko umutwe wa Wagner urebye warashenywe, nyuma y'ukwigomeka kw'uwari umukuru wawo Yevgeny Prigozhin kwabaye mu mwaka ushize, bituma muri Afurika y'uburengerazuba uwo mutwe usimburwa na Africa Corps.