Kenya yacyuye abaturage bayo bari barajyanywe ku gahato mu gisirikare c'Uburusiya

Guverinoma ya Kenya yatangaje ko yacyuye mu gihugu abarenga 18 b'Abanyakenya bari mu bihe bikomeye mu Burusiya, nyuma yo kuvugwaho ko bari barajyanyweyo binyuze mu buryo bwo gushaka abasirikare bifashishwa mu ntambara iki gihugu gihanganyemo na Ukraine.

Nk'uko byavuzwe mu itangazo rya Minisiteri y'Ububanyi n'Amahanga n'Ibibazo by'Abanyakenya baba mu mahanga, bamwe mu batabawe, bari bafite ibikomere, nyuma yo kwisanga mu kigo cya gisirikare mu Burusiya.

Minisitiri w'Ububanyi n'Amahanga, Musalia Mudavadi, yavuze ko aba baturage bacyuwe binyuze mu bikorwa bya dipolomasi byahujwe na Ambasade ya Kenya i Moscow, maze bagasubizwa mu gihugu bakoresheje impapuro z'agateganyo z'ingendo hagati y'ukwezi kwa 8 n'ukwa 12 muri uyu mwaka wa 2025.

Mu kwezi gushize, Mudavadi yihanangirije ko imiyoboro yo gushaka abasirikare igamije Abanyakenya igikomeje gukora. Yongeyeho ko Abanyakenya barenga 200 bashobora kuba barinjijwe mu gisirikare cy'u Burusiya kuva intambara yatangira mu 2022.

Guverinoma yatangaje ko abacyuwe bose bazahabwa ubufasha mu by'imitekerereze no mu buzima bwo mu mutwe, ndetse bakazinjizwa muri gahunda yo kongera kubasubiza mu buzima busanzwe, iyobowe n'Urwego rwa Leta rushinzwe Abanyakenya baba mu mahanga.

Iryo tangazo rinavuga ko Kenya iri gukorana n'u Burusiya mu biganiro bigamije kurekura no kugarura abandi baturage bagizweho ingaruka, ndetse ikaba inaganira na Ukraine ku byerekeye Abanyakenya bivugwa ko bafunzwe nk'imfungwa z'intambara.

Abayobozi basabye cyane urubyiruko rw'Abanyakenya kugenzura neza amakuru y'akazi babona mu mahanga binyuze mu nzego za Leta zemewe, kugira ngo birinde kugwa mu mutego w'amatsinda y'ubwambuzi n'uburiganya ashingiye ku gushaka abasirikare.

N'ubwo Leta ya Kenya ivuga ko irimo gukora ibishoboka byose ngo ibikorwa nk'ibi bihagarare, Paul Adoch, umuyobozi wa Trace Kenya, umuryango uharanira kurwanya icuruzwa ry'abantu, yabwiye RFI (radio mpuzamahanga y'abafaransa) ko ingamba zishyirwaho azifata nk'izitagihagije.

Ati: "Hashize imyaka itatu tubona Abanyakenya bagenda berekeza mu Burusiya".

RFI ikomeza ivuga ko mbere y'uko hakurikira abajyanwa ku rugamba, hagaragaye n'ibibazo by'abagore binjijwe ku gahato gukorera mu nganda za gisirikare.

Yongeraho ko raporo yo mu 2025 ku icuruzwa ry'abantu, yashyizwe ahagaragara na Minisiteri y'Ububanyi n'Amahanga ya Leta Zunze Ubumwe za Amerika, ivuga ku bakobwa b'Abanyakenya b'imyaka iri hagati ya 18 na 22, bakoreraga mu nganda zikora drones z'u Burusiya, mu gihe bo batekerezaga ko bagiye gukurikirana amahugurwa y'umwuga.

Paul Adoch asaba ko hashyirwaho "itegeko rigena kandi rigenzura imirimo ikorerwa mu mahanga." Umushinga w'iryo tegeko watanzwe mu Nteko Ishinga Amategeko ya Kenya umwaka ushize, ariko uracyategereje kuganirwaho.