RD Congo: Umusirikare w'imyaka 102 ukiri mu kazi yashimiwe 'imyaka myinshi y'ubudahemuka akorera igihugu'

Ku myaka ye, yakabaye yitwa 'sekombata' (ancien combattant) – izina rihabwa abasirikare bari mu zabukuru akenshi barwanye intambara zitandukanye, ariko we aracyambara impuzankano ya gisirikare agatonda ku kazi.

Minisiteri y'ingabo za Repubulika ya Demokarasi ya Congo yatangaje ko 1er sergent-major Luhembwe Alfani w'imyaka 102 akiri mu kazi k'igisirikare kandi akamazemo imyaka 78.

Uyu musirikare ukorera mu mujyi wa Kisangani, umurwa mukuru w'intara ya Tshopo, ku wa kane yakiriwe na Minisitiri w'ingabo z'iki gihugu wari uri mu ruzinduko muri ako gace, "baraganira" nk'uko bivugwa na Minisiteri y'ingabo.

Nta byinshi byari bisanzwe bizwi kuri uyu mukambwe usaziye mu kazi ubusanzwe kazwiho kuba gasaba ubwitange, ikinyabupfura, n'imbaraga z'umubiri.

Muri RDC imyaka yo kujya mu kiruhuko cy'izabukuru ku bakozi basanzwe ni 60, kandi itegeko ryo mu 2013 rigena imiterere y'ingabo z'iki gihugu rivuga ko umusirikare w'ipeti nk'irya Luhembwe yemerewe kujya mu kiruhuko cy'izabukuru ku myaka 50, bivuze ko yashoboraga kuba yarasezerewe mu 1975 ku gihe cy'ubutegetsi bwa Mobutu Sese Seko.

Gusa mu mirimo ya leta muri iki gihugu haracyari ikibazo cy'abantu benshi bakuze bakiri mu kazi kubera gutinya kujya mu kiruhuko cy'izabukuru ariko amafaranga ya 'pension' yabo ntabagereho.

Mu 2022, Minisiteri y'imirimo ya leta yatangaje ko abakozi hafi 400,000 bari mu myaka 70, 80, 90 yewe na 100 y'ubukure bakiri mu kazi bategereje gushimirwa na leta bagashyirwa mu kiruhuko cy'izabukuru mu buryo bwemewe, bityo bagatahana icyizere ko 'pension' yabo izajya ibageraho.

1er sergent-major Luhembwe ashobora kuba ari umwe muri abo.

Uhereye ku myaka amaze mu gisirikare yatangajwe na Minisiteri y'ingabo uyu mukambwe yinjiye mu gisirikare nyuma gato y'intambara ya kabiri y'isi.

Luhembwe - niba zimwe atarazirwanye, ashobora kuba azi byinshi ku ntambara zitandukanye zabaye muri Congo, iza cyera mu myaka ya za 1960, intambara za Congo I na Congo II zo mu myaka y'impera za 1990 n'intangiriro za 2000 n'izindi…Naho intambara ziri kuba ubu mu burasirazuba bw'iki gihugu zo zishobora kuba zarasanze atagifite umugongo wo kujya mu irasaniro.

Ibinyamakuru muri RDC bisubiramo Ministiri Guy Kabombo Muadiamvita agira ati: "Uyu mugabo ni ikimenyetso kikiriho cy'ubutwari, ikinyabupfura no kwitangira gukorera igihugu. Akwiye ishimwe rya Repubulika".

Kabombo yizeje sergent-major Luhembwe ko "mu minsi iri imbere "azambikwa impeta z'ishimwe ku bw'ubudahemuka mu gukorera igihugu".