Malawi: Impunzi zirasaba leta kutazitegeka kuba mu nkambi

Impunzi ziba muri Malawi ziravuga ko zihangayikishijwe n'icyemezo cya leta cyo kuzisaba kuva aho zituye zikajya mu nkambi zagenewe ya Dzaleka.

Abarebwa n'iki cyemezo ni impunzi zigera ku bihumbi 8 zituye mu mijyi cyangwa ahandi mu duce tw'igihugu tutari muri iyo nkambi.

Ariko benshi mu barebwa nacyo basanzwe bamenyereye ubuzima bw'imirimo itandukanye irimo n'abikorera ku giti cyabo.

N'ubwo guverinoma yari yatanze itariki 15 z'ukwezi kwa Kane nk'umunsi ntarengwa kugira ngo abarebwa n'aya mabwiriza babe bimutse, ntibirashyirwa mu bikorwa ku buryo bw'ingufu.

Cyakora abahagarariye impunzi mu gihugu bavuga ko bafite impungenge.

Prudent Nsengiyumva yavuganye na Simon Nzigamasabo, umunyamabanga w'ishyirahamwe ry'impunzi z'abarundi n'abanyarwanda uri mu mujyi wa Nkhotakota, abanza kumubwira ko batangazwa n'icyo cyemezo cya leta ya Malawi (umva ikiganiro bagiranye aho hejuru).