M23 'yafashe Kalehe centre na Ihusi', FARDC iramagana guhonyora agahenge

Inyeshyamba za M23 zafashe agace k'ubucuruzi ka Kalehe Centre hamwe na Ihusi kuri kilometero hafi 70 mu majyaruguru y'umujyi wa Bukavu mu ntara ya Kivu y'Epfo, nk'uko bivugwa n'ibinyamakuru muri DR Congo.

Ku wa gatatu, igisirikare cya leta muri iyi ntara cyatangaje ko M23 mu gikorwa cyo kurenga ku gahenge kasabwe n'inama y'i Dar es Salaam, M23 yateye ibirindiro by'ingabo muri Kalehe Centre na Ihusi ko "ibyo bitero byateye kubura ubuzima bw'abasivile benshi".

Uruhande rwa M23 ntacyo ruratangaza ku byavuzwe n'ingabo za leta zivuga ko ari ingabo z'u Rwanda zifatanya na M23 – ibyo izi mpande zombi zo zihakana.

Uruhande rwa leta cyangwa ingabo ntacyo baratangaza ku ifatwa rya Kalehe centre na Ihusi.

Umwe mu bakuriye sosiyete civile ya Kalehe utifuje gutangazwa, yabwiye BBC ko kuva ku mugoroba wo ku wa gatatu Kalehe centre - umujyi mukuru wa teritwari ya Karehe - irimo abarwanyi ba M23.

Yagize ati: "Turi hano, bamwe bahunze, abandi twahagumye. Dufite ubwoba ariko ntakundi twari tubyiteguye turebye ibyabaye za Minova n'ahandi muri iyi teritwari yacu".

Ikinyamakuru Actualités cyo muri RD Congo gisubiramo amasoko avuga ko ku wa gatatu habaye imirwano ikomeye muri Kalehe Centre na Ihusi ingabo za leta zigahunga ahagana ku gicamunsi.

Nyuma, bamwe mu barwanyi ba M23 bagaragaye mu mashusho bari ku biro bya teritwari ya Karehe muri iyi centre, amakuru avuga ko bagenzura n'icyambu cy'uyu mujyi ku kiyaga cya Kivu.

Imirwano yatangiye ku wa kabiri igakomera ku wa gatatu yatumye abaturage bo muri utu duce bahungira mu byerekezo bitandukanye birimo kuri bimwe mu birwa byo mu kiyaga cya Kivu no ku kirwa kinini cya Idjwi, abandi berekeje mu majyepfo bagana i Bukavu, nk'uko umwe mu bagize sosiyete civile ya Kalehe yabibwiye BBC.

Ibinyamakuru muri RD Congo bivuga ko ingabo za leta zifatanyije n'ingabo z'u Burundi zashinze ibirindiro bikomeye i Katana, na Kavumu – umujyi muto ufite ikibuga cy'indege – uri kuri kilometero zirenga gato 30 uvuye muri centre ya Kalehe.

Barasaba leta kwirinda ko imirwano ibera i Bukavu

Nyuma ya kiliziya gatolika ya Bukavu yabisabye mu cyumweru gishize, ihuriro rya sosiyete civile mu ntara ya Kivu y'Epfo, BCSC S-K, ryasabye abategetsi b'iyi ntara kwirinda ko imirwano igera mu mujyi wa Bukavu.

Mu ibaruwa ukuriye iri huriro yanditse ku wa gatatu, yavuze ko barebye uko intambara yahereye i Bunagana muri Rutshuru, ibyabaye i Goma, n'ibyo "turimo kubona birimo kuba muri Kalehe" basabye bategetsi kugira icyo bakora ntibikomeze.

Iyi baruwa yabo BBC yaboneye kopi igira iti: "Ku bwacu, niba ingabo mufite zititeguye kurinda abasivile cyangwa zidafite ubushobozi bwo kubikora, tubona ko bitaba birimo ubwenge kurwanira mu mujyi wa Bukavu, by'umwihariko, n'ahandi mu bice by'umujyi by'iyi ntara muri rusange.

"Ibyo byazanira abasivile, yewe n'abasirikare, ibagiro ry'abantu, hamwe cyangwa, n'ubuhunzi."

Mu itangazo, ingabo za leta muri Kivu y'Amajyepfo ku wa gatatu zatangaje ko "ibirindiro byacu bizarindanwa imbaraga ibitero byose aho byaturuka".