'Ni nk'isinema ya Sci-Fi': Uruhinja rwavutse mu rusoro rwari rubitswe imyaka 30 rwaciye umuhigo

Umuryango wo mu ntara ya Ohio muri Reta Zunze Ubumwe za Amerika wavyaye umwana w'umuhungu avuye ku rusoro (embryon) rwari rwarabitswe mu bukonje imyaka 30 irenga, ikiringo ca mbere kirekire kw'isi yose.

Lindsey w'imyaka 35 na Tim Pierce w'imyaka 34 bakiriye uno mwana wabo Thaddeus Daniel Pierce, ku wa gatandatu. Umupfasoni Lindsey yabwiye ikinyamakuru MIT Technology Review ko umuryango wiwe ubona ko ari "ikintu gisa na isinema ya science-fiction".

Uru ruhinja ni rwo ruciye umuhigo kw'isi yose nk'uruvuye mu rusoro rwabitswe mu bukonje igihe kirekire imbere y'uko ruvamwo umwana.

Abari baherutse guca umuhigo bari amahasa yavutse mu 2022 mu nsoro zabitswe mu bukonje mu 1992.

Umuryango wa Pierce wari umaze imyaka indwi urondera kuvyara umwana ariko bikanka, ariho wemera kwakira uru rusoro rwa Linda Archerd ubu afise imyaka 62, rwakozwe mu 1994, mw'igi ryiwe n'urubuto rw'uwari umugabo wiwe ico gihe, hakoreshejwe ubuhinga bwa IVF (Fécondation in vitro/In vitro fertilization).

Ico gihe, uno mupfasoni Archerd yaremye insoro zine. Rumwe rwavuyemwo umukobwa wiwe ubu afise imyaka 30, izindi zibiri ziguma zibitswe.

Nubwo yavanye n'umugabo wiwe, ntiyashatse guheba insoro ziwe, canke ngo azitange zikoreshwe mu bushakashatsi, canke ngo azihe uwundi muryango bitamenyekanye.

Avuga ko vyabaye ikintu ciza kubona yagize uruhara mu kuroka uru ruhinja, kuko ruzoba rufitaniye isano n'umukobwa wiwe ubu akuze.

Umupfasoni Archerd yariha ibihumbi n'ibihumbi vy'amadorari kugira ngo bamubikire izi nsoro ziwe imbere y'uko ateba akaronka ikigo rukristu cemera kwakira insoro, kizwi nka Nightlight Christian Adoptions, mu mugambi waco uzwi nka Snowflakes. Vyinshi muri ibi bigo bibona ko imigambi yavyo irokora ubuzima.

Uno mugambi w'iki kigo wahiswemwo n'umupfasoni Archerd wemerera bene insoro kwihitiramwo abo bashaka kuziha, ibi bigasigura ko bashobora guhitamwo idini, ubwoko n'amamuko y'abo bashaka kuzifashisha.

Umupfasoni Archerd yashaka ko zihabwa umugabo n'umugore b'abazungu, b'abakristu kandi baba muri Amerika, kuko atashaka "kuja hanze y'ihigugu", nk'uko yabibwiye MIT Technology Review.

Yahavuye aronka abo babihurizako, umuryango wa Pierce na Lindsey.

Ikigo c'ubuvuzi, Rejoice Fertility, gikoresha ubuhinga bwa IVF mu ntara ya Tennessee, ari naho habereye iki gikorwa, kivuga ko intego yaco yari iyo gutanga urusoro urwo ari rwo rwose cahawe, ata kuraba imyaka canke ingene abantu babayemwo.

Umupfasoni Lindsey avuga ko we n'umugabo wiwe batari bafise intego yo "guca umuhigo", ko ico barondera conyene kwari "kuronka umwana".

Umupfasoni Archerd yabwiye MIT Technology Review ko atarabona uru ruhinja amaso mu yandi, ariko ko yamaze kubona ko asa n'umukobwa wiwe.