Igor Mangushev: Umurwanyi kabombo w’Uburusiya yiciwe muri Ukraine

Umurwanyi kabombo w’Uburusiya umusirikare w’ipeti rya kapiteni Igor Mangushev yaguye mu bitaro nyuma y’iminsi arashwe mu mutwe yegerewe mu gace ka Ukraine kigaruriwe n’Uburusiya, nk’uko inshuti ze zibivuga.

Tatyana, umugore wa Igor, yavuze ko urupfu rw’umugabo we ari ihotorwa.

Mangushev yahoze ari komanda wa inite irwanya za drone mu gace kafashwe ka Luhansk, ariko ni n’umwe mu bashinze itsinda ry’abacancuro ryarwanyije ingabo za Ukraine mu 2014.

Mu mpeshyi ishize Mangushev yaramenyekanye cyane ubwo yabonekaga afite agahanga k’umuntu.

Muri video yashyizwe ku mbuga nkoranyambaga muri Kanama(8) ishize, Mangushev yavugaga ko ako gahanga ari ak’umurwanyi wa Ukraine wishwe arwana ku ruganda rw’ibyuma rwa Azovstal, mu mujyi wo ku cyambu wa Mariupol.

Umuhezanguni, Mangushev yavuze ko Uburusiya bitarimo kurwanya abantu, ahubwo ko buri kurwanya igitekerezo cya Ukraine nka “Leta yanga Uburusiya”, kandi ko hatitawe ku mubare w’abanya-Ukraine bamaze gupfa.

Mangushev yashinze umutwe w’abacancuro wigenga witwa Yenot, nyuma bimenyekana ko afatanya n’umukuru w’abacancuro ba Wagner, Yevgeny Prigozhin, inshuti ya hafi ya Perezida Vladimir Putin.

Kuraswa kwa Mangushev kwateje impuha ku waba wamurasiye kuri bariyeri iri mu mujyi wa Kadiivka wa Ukraine mu gace kagenzurwa n’Abarusiya, ahatari kure cyane y’urugerero rw’urugamba.

Amakuru yo mu Burusiya avuga ko yarashwe mu mutwe n’umuntu umwegereye, ko abategetsi barimo gukora iperereza kandi ntacyo batangaje ku rupfu rwe.

Isasu bivugwa ko ryagumye mu bwonko bwa Igor, mbere y’uko ajyanwa kwa muganga mu akaba ariho agwa, amafoto amwerekana aryamye ku gitanda mu bitaro.

Undi muhezanguni w’Umurusiya ku kurwanya Ukraine, witwa Pavel Gubarev, avuga ko buri wese azi uri inyuma y’iraswa rya Mangushev, kandi biboneka uburyo Yevgeny Prigozhin muri iki gihe yacecetse.

Amezi 11 mu ntambara muri Ukraine amaze gutuma hari abahezanguni b’Abarusiya bashwanira muri iyi ntambara, ndetse yateje amahari hagati yabo.

Nyuma y’iyicwa rya Igor, inzobere ku Burusiya Mark Galeotti ivuga ko ibi birimo kwerekana ko burimo gusubira mu byabaye mu myaka ya 1990, “ubwo ubwicanyi bwari amayeri, kandi imirongo hagati ya politike, ubucuruzi, urugomo n’intambara byabaye nk’aho ntacyo bivuze.”