DR Congo: Denis Mukwege arashinja ishyaka riri ku butegetsi politike yubakiye ku "gusingiza umuntu"

Dr Denis Mukwege, umunyecongo wahawe igihembo cy'amahoro cyitiriwe Nobel mu 2018 yatangaje ko yamagana umuhate w'ishyaka riri ku butegetsi wo gushaka guhindura Itegeko nshinga ngo perezida uriho ahabwe manda iryo tegeko ribuza.

Ihuriro ry'amashyaka ari ku butegetsi muri RD Congo, Union sacrée, ryatangije ibikorwa byo "kugisha inama" ku guhindura Itegeko nshinga kugira ngo Perezida Félix Tshisekedi ahabwe manda ya gatatu.

Bamwe mu bategetsi muri leta ya Tshisekedi bashimangiye ko iyo manda ari yo "barimo kuganaho".

Mukwege, ubu uba mu buhungiro i Burayi nyuma yo kuva mu bitaro bye bya Panzi hafi Bukavu ahagenzurwa ubu n'umutwe wa M23, mu butumwa yashyize ku mbuga nkoranyambaga, yavuze ko manda ya kabiri "ari na yo ya nyuma" ya perezida uriho izarangira muri Mutarama 2029.

Yagize ati: "Mu gutangiza ibiganiro ku kuba itegeko nshinga ryahindurwa kugira ngo umukuru w'igihugu ahabwe manda ya gatatu, ingingo fatizo za demokarasi nanone zishyizwe mu kaga muri RDC".

Mukwege ashinja Union sacrée "gushaka kwihambira ku butegetsi mu gushinga 'sisteme' yubakiye ku gusingiza umuntu".

Mukwege avuga ko ikibazo RD Congo ifite atari inyandiko z'amategeko "ahubwo ni abagabo n'abagore bashoboye gutegeka bikwiriye bakizeza amahoro, ubutabera, akazi n'agaciro ka bose".

Tshisekedi aheruka kuvuga ko amatora "ntashoboka tudafite Kivu y'Epfo na Kivu ya Ruguru", akavuga ko igihugu kitazakora amatora "kiri mu ntambara", ariko kandi ko yakoresha amatora ya referandum mu kureba niba abaturage bashaka kumuha manda ya gatatu, avuga ko babimusabye yabyemera.

Mukwege yavuze ko ingingo z'Itegeko Nshinga zibuza ko hari impinduka zirikorwaho "mu gihe cy'intambara" kandi ko manda z'umukuru w'igihugu "zibujijwe guhindurwa".

Denis Mukwege yiyamamarije kuba perezida wa RDC mu matora aheruka ya 2023 aho yasoje ku mwanya wa gatandatu abonye amajwi hafi 40,000.