Ubushinwa buri kugerageza gahunda yo kudasaba viza ku bihugu bitandatu

Minisiteri y'ububanyi n'amahanga y'Ubushinwa yavuze ko burimo kugerageza gahunda y'ingendo nta viza (visa) ku baturage b'Ubufaransa, Ubudage, Ubutaliyani, Ubuholandi, Espanye na Malaysia mu gihe cy'umwaka umwe.

Kuva mu Kuboza (12) uyu mwaka kugeza ku itariki ya 30 Ugushyingo (11) mu 2024, abaturage bo muri ibyo bihugu bafite inzandiko z'inzira (pasiporo) zisanzwe bashobora gukorera ubucuruzi mu Bushinwa cyangwa kuhatemberera nta viza mu gihe kigera ku minsi 15.

Kuri uyu wa gatanu, Mao Ning, umuvugizi wa minisiteri y'ububanyi n'amahanga y'Ubushinwa, yavuze ko ibi ari mu rwego rwo gufasha "kwamamaza iterambere rifite ireme ryo ku rwego rwo hejuru ry'Ubushinwa no gufungura amarembo".

Kuri ubu, benshi mu bagenzi bajya mu Bushinwa bacyenera viza kugira ngo binjire muri icyo gihugu.

Ingero zidakunze kubaho z'abasonerwa viza zirimo iz'abaturage ba Singapour na Brunei, binjira mu Bushinwa ku mpamvu z'ubucuruzi, ubukerarugendo, gusura abo mu miryango yabo cyangwa bahahagaze berekeza ahandi (transit), bakamara iminsi itarenze 15.

Muri Werurwe (3) uyu mwaka, ni bwo Ubushinwa bwatangiye kongera gutanga viza z'amoko (ibyiciro) yose. Muri Werurwe mu 2020, bwari bwarashyizeho amategeko akaze abuza ingendo, nyuma yuko icyorezo cya coronavirus cyadutse.

Mu gihe cy'imyaka itatu, Ubushinwa bwashyizeho amwe mu mategeko ya mbere akaze cyane ku isi yo kurwanya Covid, buhagarika ingendo, bushyiraho za guma mu rugo nyinshi ndetse bugasaba abaturage kwipimisha kenshi.

Gahunda yabwo yo kutagira umuntu n'umwe urwaye Covid, yashegeshe ubukungu bwabwo, yakuweho mu Kuboza kw'umwaka ushize.

Mbere y'icyo cyorezo, abanyamahanga babarirwa muri miliyoni za mirongo ni bo basuraga Ubushinwa buri mwaka.