Imvo n'Imvano ku kwemerera abana b'imyaka 15 uburyo bwo kuboneza urubyaro mu Rwanda

Inyandiko gusa
Insiguro y'amajwi, Imvo n'Imvano

Ikiganiro cyacu uyu munsi kuwa gatandatu tariki 30 z'ukwezi kwa 8 umwaka 2025 turavuga ku mushinga w'itegeko ry'umuryango ririmo ingingo yemerera abana b'imyaka 15 guhabwa uburyo bwo kuboneza urubyaro atari ngombwa kubiherwa uruhushya n'ababyeyi.

Minisiteri y'ubuzima mu Rwanda yavuze ko imyaka ntarengwa ya cumi n'umunani yari iriho itatumye inda zitateganijwe zigabanuka kuri abo bana ngo ku buryo umwaka ushize zarengaga ibihumbi makumyabiri.

Nyuma yo kwemeza uwo mushinga w'itegeko impaka mu baturage ni zose.

Imiryango iharanira uburenganzira bwa muntu yishimiye iryo tegeko ivuga ko ahubwo ryari ryaratinze kubera icyo yise ''uburemere bw'ikibazo'' cy'inda zitateganyijwe ziterwa abangavu.

Ni mu gihe bamwe mu banyamadini ndetse n'abaturage bamwe na bamwe bavuga ko kwemerera abana b'imyaka 15 kuboneza urubyaro ari ''amahano'' no gushora abana mu busambanyi.

Mu mwaka wa 2022 intekonshingamategeko yari yanze uwo mushinga ndetse na Perezida w'u Rwanda Paul Kagame mu kiganiro n'abanyamakuru mu mwaka 2019 yari yagaragaje ko atabishyigikiye.

Ikiganiro cyo kuri uyu munsi mwagiteguriwe kandi murakigezwaho na Yves Bucyana.