Zelensky avuga ko Abashinwa 155 barwanira Uburusiya muri Ukraine

Perezida wa Ukraine Volodymyr Zelensky avuga ko Abashinwa nibura 155 barimo kurwana ku ruhande rw'Uburusiya mu ntambara.

Avuze ayo magambo nyuma yuko abarwanyi babiri b'Abashinwa bafashwe muri iki cyumweru - buba ubwa mbere Ukraine ishinje Ubushinwa ku mugaragaro guha Uburusiya abasirikare.

Aganira n'abanyamakuru ku wa gatatu, Zelensky yongeye gusubiramo ko hari Abashinwa "bandi benshi" barimo kurwana mu ntambara, ashingiye ku makuru yakusanyijwe na leta ye.

Kuri uyu wa kane, umuvugizi wa leta y'Ubushinwa yavuze ko bajya (batanga) inama ko "impande bireba zisobanukirwa neza kandi mu buryo burimo ubushishozi uruhare rw'Ubushinwa no kutavuga amagambo atarimo gushyira mu gaciro".

Lin Jian, umuvugizi wa minisiteri y'ububanyi n'amahanga y'Ubushinwa, yongeyeho ati: "Ubushinwa ntibwateje ndetse ntiburi mu makuba yo muri Ukraine. Dushyigikiye cyane ndetse duteza imbere umuti unyuze mu mahoro w'amakuba."

Yashimangiye ibyo yari yavuze mbere, ubwo yabaye nk'uwumvikanisha ko abasirikare b'Ubushinwa barwanira Uburusiya barimo kubikora ku giti cyabo.

Lin yavuze ko "buri gihe leta y'Ubushinwa isaba Abashinwa kugendera kure uturere turimo intambara, kwirinda kugira uruhare urwo ari rwo rwose mu ntambara, ndetse by'umwihariko kwirinda kujya mu bikorwa [operations] bya gisirikare by'uruhande urwo ari rwo rwose".

Mbere, Ubushinwa bwahakanye ko hari abaturage babwo benshi barwana ku ruhande rw'Uburusiya, buvuga ko ibyo "nta shingiro" bifite.

Mbere yaho muri iki cyumweru, Zelensky yavuze ko ingabo za Ukraine zarwanye n'abasirikare batandatu b'Ubushinwa mu karere ka Donetsk ko mu burasirazuba bwa Ukraine, nuko zifatamo babiri zibagira imfungwa. Uburusiya bwanze kugira icyo bubivugaho.

Ku wa gatatu, Zelensky yavuze ko "ikibazo cy'Ubushinwa kirakomeye".

Ibiro ntaramakuru Interfax byo mu Burusiya byasubiyemo amagambo ya Zelensky agira ati: "Hari abantu 155 bafite amazina yo mu muryango, hamwe n'amakuru yo muri pasiporo - Abashinwa 155 barimo kurwanya Abanya-Ukraine ku butaka bwa Ukraine."

Yongeyeho ko Uburusiya burimo kwinjiza mu gisirikare Abashinwa bunyuze ku mbuga nkoranyambaga, ndetse ko "ubutegetsi bw'Ubushinwa burabizi".

Nkuko Zelensky abivuga, abo bivugwa ko binjizwa mu gisirikare bahabwa imyitozo i Moscow mu murwa mukuru w'Uburusiya, nyuma bakoherezwa ku rugamba muri Ukraine, ndetse bagahabwa n'ibyangombwa by'inzira n'amafaranga yo kubishyura.

Amerika yavuze ko ayo makuru y'ibivugwa "ateye impungenge".

Mu gihe cyashize, Ukraine yakemanze umurongo w'Ubushinwa, ku mugaragaro buvuga ko nta ruhande bubogamiyeho. Mbere, Zelensky yashinje Ubushinwa gutanga "ibintu biri mu ntwaro z'Uburusiya" ndetse asaba Ubushinwa kuguma mu murongo "udahindagurika".

Amerika yakomeje gushinja Ubushinwa gufasha Uburusiya gukora intwaro nyinshi kurushaho, imodoka z'intambara zitamenwa n'amasasu asanzwe ndetse na misile.

Ubushinwa bwanakurikiraniwe hafi kubera kwemera ko ikoranabuhanga rikora imirimo ibiri rishobora gukoreshwa mu bucuruzi no mu gisirikare - nko muri mudasobwa (computer chips) no mu ndege nto z'intambara zitajyamo umupilote (drone) - ryoherezwa mu Burusiya.

Nubwo Ubushinwa n'Uburusiya ari inshuti za hafi muri politike no mu bukungu, Ubushinwa bwagerageje kwigaragaza nk'ubudafite uruhande bubogamiyeho mu ntambara, ndetse bwakomeje guhakana buvuga ko nta bikoresho bya gisirikare buha Uburusiya.

Bushyigikira ubucuruzi bukorana n'Uburusiya, buvuga ko nta ntwaro zica bugurisha mu Burusiya ndetse ko bukorana "ubushishozi mu kohereza ibikoresho bikora imirimo ibiri, hubahirizwa amategeko n'amabwiriza".

Ibi birego bijyanye n'abasirikare b'Ubushinwa barwanira Uburusiya bije bikurikira ifatwa ry'abasirikare babiri ba Koreya ya Ruguru bakomeretse, Ukraine yavuze ko yafatiye mu karere ka Kursk Oblast ko mu Burusiya.