FDN na RDF ntibavuga rumwe ku kuntu umusirikare w'u Rwanda yisanze mu Kirundo

Ingabo z'u Burundi (FDN) n'ingabo z'u Rwanda (RDF) zemeje ko umusirikare w'u Rwanda w'umushoferi Sergeant (Sgt) Emmanuel Sadiki yarenze umupaka ku wa gatatu yinjira mu Burundi, ariko ntizihuza ku mpamvu yatumye arenga umupaka.

RDF ivuga ko Sgt Sadiki "yayobye atabishaka" akambuka umupaka wa Gasenyi-Nemba mu majyepfo ashyira uburasirazuba bw'u Rwanda, polisi y'u Burundi ikamuta muri yombi.

Ingabo z'u Rwanda zivuga ko uwo musirikare wazo ubu afungiye kuri stasiyo ya polisi ya Kirundo muri komine Busoni, mu ntara ya Butanyerera, mu majyaruguru y'u Burundi.

Ariko FDN ivuga ko Sgt Sadiki yayisobanuriye ko "yayobye inzira imusubiza aho yavuye ku kabari kari hafi cyane y'ikigo cya gisirikare cya Gako", kirimo n'ishuri rya gisirikare.

Mu itangazo zasohoye, ingabo z'u Burundi zivuga ko uwo musirikare "yagerageje guhunga ariko biba iby'ubusa", ubwo yari amaze kurenga metero 700, abapolisi bo ku mupaka bamuta muri yombi, ubu akaba afunzwe na polisi ya Kirundo "mu gihe amaperereza akomeje".

BBC Gahuzamiryango ntiyashoboye kugenzura mu buryo bwigenga ibivugwa n'impande zombi.

Mu gihe cyashize u Rwanda na Repubulika ya Demokarasi ya Congo byagiye bitangaza amakuru y'abasirikare bo ku mpande zombi bafashwe barenze umupaka, ariko ubu ni bwo bwa mbere mu myaka ya vuba aha ishize ibi bibaye hagati y'u Rwanda n'u Burundi.

Mu itangazo yasohoye, RDF ivuga ko ibabajwe n'ibi byabereye ku mupaka ibihugu byombi bisangiye, ndetse ko izakora "ibikorwa bya ngombwa mu rwego rwa dipolomasi [mu kuvugana] na Leta y'u Burundi"kugira ngo isubize uwo musirikare mu Rwanda.

Umubano w'u Burundi n'u Rwanda wabaye mubi kuva mu mwaka wa 2015 ubwo Gitega yashinjaga Kigali kugira uruhare mu igerageza ryapfubye ryo guhirika ubutegetsi mu Burundi no gucumbikira bamwe mu bari bakuriye uwo mugambi – ikirego u Rwanda rwakomeje guhakana.

Mu Kwakira (10) mu 2020, abari ba minisitiri b'ububanyi n'amahanga b'impande zombi bahuriye ku mupaka wa Nemba-Gasenyi, mu muhate wo kuzahura umubano hagati y'ibihugu byombi.

Ibintu byasubiye irudubi mu ntangiriro ya Mutarama (1) mu 2024, ubwo u Burundi bwongeraga gufunga imipaka yabwo y'ubutaka n'u Rwanda.

Mu mpera ya Mutarama (1) muri uyu mwaka wa 2025, Perezida w'u Burundi Évariste Ndayishimiye yavuze – nta gihamya atanga – ko u Rwanda rufite umugambi wo gutera igihugu cye.

Ariko muri Werurwe (3) uyu mwaka, Minisitiri w'ububanyi n'amahanga w'u Rwanda Olivier Nduhungirehe yatangaje ko igihugu cye n'u Burundi byari biri "mu nzira yo kureka ubushyamirane no kumvikana".

Umubano hagati ya Gitega na Kigali warushijeho kuzamba ubwo u Burundi bwoherezaga ingabo zabwo – ku butumire bwa leta ya Kinshasa – gufatanya n'ingabo za FARDC kurwanya inyeshyamba za M23.

Abategetsi b'u Rwanda bagaragaje ko batishimiye icyo gikorwa kuko bashinja ingabo za FARDC gufatanya n'umutwe wa FDLR abategetsi bavuga ko uteje inkeke ku mutekano w'u Rwanda.

Abategetsi b'u Burundi na bo bagiye bumvikana bashinja u Rwanda gukorana n'umutwe wa RED-Tabara urwanya ubutegetsi bwa Gitega, kandi ko na wo ufatanya n'umutwe wa M23 byagiye bivugwa kenshi na ONU na leta ya Kinshasa ko uwo mutwe wa M23 ufashwa n'u Rwanda.

Ibi byose bituma bigaragara nkaho u Burundi n'u Rwanda birimo kurwana mu ntambara mu burasirazuba bwa DR Congo, nubwo bitigeze byemezwa gutyo n'abategetsi.