Gen Muhoozi Kainerugaba ntakozwa ibyuko Museveni yamubujije gutangaza ibya leta kuri Twitter

Jenerali Muhoozi Kainerugaba avuga ko "nta muntu n'umwe uzambuza ikintu na kimwe", nyuma y'umunsi se, Perezida wa Uganda Yoweri Museveni, ategetse ko ahagarika kujya atanga ibitekerezo kuri Twitter ku bintu bijyanye na leta ya Uganda.

Perezida Museveni yabivuze nyuma yuko mu byumweru bibiri bishize Jenerali Kainerugaba atangaje ubutumwa kuri Twitter bwateje impaka.

Icyo gihe, Jenerali Kainerugaba yakangishije gutera igihugu cya Kenya gihana imbibi na Uganda, bituma we na Perezida Museveni basaba imbabazi ku mugaragaro ndetse habaho n'inama z'abadipolomate zo gushimangira umubano w'ibihugu byombi.

Ku wa mbere, Perezida Museveni yavuze ko Jenerali Kainerugaba agomba kuzibukira akareka kujya kuri Twitter "kuvuga ku bindi bihugu na politiki yuko Uganda ibona ibintu".

Ariko mu gisubizo yatangaje hashize amasaha nyuma yaho, Jenerali Kainerugaba yibajije niba uko kumubuza ibyo ari "ubwoko runaka bw'urwenya".

Ati: "Numva ko hari umunyamakuru wo muri Kenya wasabye papa wanjye kunkura kuri Twitter? Ibyo ni ubwoko runaka bw'urwenya??

"Ndi umuntu mukuru kandi NTA MUNTU N'UMWE uzambuza ikintu na kimwe!"

Jenerali Kainerugaba azwiho gutangaza kuri Twitter ubutumwa buteza impaka, burimo nk'ubwo yatangaje avuga ko ashyigikiye igitero cy'Uburusiya kuri Ukraine, n'aho yavuze ko ashyigikiye inyeshyamba zo muri Tigray zirwana na leta ya Ethiopia.