RDC yatangaje ko Ebola yari yadutse ku nshuro ya 16 yacitse mu gihugu

    • Umwanditsi, Emery Makumeno
    • Igikorwa, BBC Afurika i Kinshasa

Repubulika ya Demokarasi ya Congo yatangaje ko icyorezo cya Ebola cyari cyaradutse ku nshuro ya 16 muri icyo gihugu cyarangiye, nyuma y'iminsi 90 yari ishize bitangajwe ko cyagaragaye muri teritwari ya Mweka ku itariki ya 4 Nzeri (9).

Minisitiri w'ubuzima Dr Roger Samuel Kamba yabitangarije i Kinshasa, avuga ko ari "igikorwa gikomeye ku gihugu cyacu no ku bafatanyabikorwa bacu".

Iki cyorezo byemejwe ko abantu 53 banduye, 11 bacyekwagaho kuba baracyanduye, naho 34 cyarabishe, abandi 19 barakize, mu duce dutandatu twatangiwemo ubuvuzi.

Hakozwe igikorwa kinini cyo gukingira abantu 47,477, cyakoreshwemo doze hafi hafi 48,000 z'inkingo.

Dr Mwamba, umuyobozi mukuru w'ikigo cy'igihugu gishinzwe ubuzima rusange muri DRC, yashimye abagize uruhare muri iki gikorwa bose.

Yagize ati: "Iyi ntsinzi ntiyari gushoboka hatabayeho imbaraga zashyizweho n'ibiro bya Perezida, leta, na minisiteri y'ubuzima."

Zimwe mu ngamba z'ingenzi zashyizweho, ni itsinda ry'abaganga ryahise ryoherezwa, ibikoresho bifata ibipimo, inkingo ndetse n'ikoreshwa ry'umuti witwa Ebanga.

Abaganga barenga 1,350 ndetse n'imiryango 26 itanga ubufasha, n'ikigo cy'Amerika cyo kurwanya no gukumira indwara, bagize uruhare mu bikorwa byo guhangana n'iyi Ebola yari yongeye kwaduka.

Skip Ibisomwa cane and continue reading
Ibisomwa cane

End of Ibisomwa cane

Thomas Musangu na Marie Jeanne Kadima, barokotse iki cyorezo, bashimiye abategetsi, mu izina ry'abandi nka bo bahoze bavurirwa mu byumba by'indembe.

Ubu igihugu cyinjiye mu minsi 90 yo kuba maso no kugenzura inzego z'ubuvuzi, no gukomeza kwita ku barwayi.

Inzobere mpuzamahanaga na zo zashimye iyi ntambwe yatewe.

Profeseri Mohamed Yakub Janabi, umukuru w'ishami ry'Umuryango w'Abibumbye ryita ku buzima (OMS/WHO) ku rwego rw'Afurika, yagize ati: "Kurangiza iki cyorezo mu minsi 90 ni intambwe ikomeye itewe."

Dr Jean Kaseya, Umunye-Congo ukuriye ikigo cy'Afurika cyo kurwanya no gukumira indwara, yibukije ko "hagati y'umwaka wa 2020 na 2025, [leta ya] DRC yatangaje ibyorezo birindwi, birimo n'igikaze cyane cyo mu ntara ya Kivu ya Ruguru cyishe abantu 2,280 mu [bantu] 3,470 hagati y'umwaka wa 2018 na 2020".

Ibi byatangajwe na leta ya DRC ku wa mbere ni intambwe itanga icyizere mu rugamba rumaze igihe kirere rwo guhangana na Ebola muri iki gihugu.