Umukinnyi wa Boxe yapfuye nyuma yo gutera amakofe ‘ahatari umuntu’

Umukinnyi w’iteramakofe wa Africa y’Epfo yapfuye nyuma yo kuva amaraso ku bwonko mu mukino wabereye i Durban muri weekend ishize. 

Simiso Buthelezi w’imyaka 24 ku cyumweru yari yahuye na mugenzi we Siphesihle Mntungwa bahatanira ikamba rya WBF All Africa mu bafite ibiro bicyeya. 

Ariko agace (round) ka 10 k’uyu mukino kahagaritswe n’umusifuzi nyuma y’uko Buthelezi agiye ku ruhande agatangira gutera amakofe umuntu udahari. 

Amashusho yo muri uyu mukino yerekana Mntungwa yaheze mu migozi y’ikibuga (ring) amaze kuganzwa na Buthelezi.

Ariko Buthelezi ahita asatira indi nguni y’ikibuga itarimo umuntu atera amakofe cyane. 

BBC ntibazwa ibivuye ku zindi mbuga

Mntungwa yahise yemezwa nk’utsinze, mu gihe Buthelezi yituye hasi akihutanwa kwa muganga. 

Yahise ashyirwa muri coma nyuma yo kubona ko arimo kuvirirana mu bwonko.

Ishyirahamwe ry’umukino w’iteramakofe muri Africa y’Epfo (BSA) ryemeje urupfu rwa Buthelezi kuwa kabiri nijoro mu itangazo batanze hamwe n’umuryango we. 

Bashimagiza Buthelezi “nk’umuteramakofe ukomeye wari intangarugero mu kibuga no hanze yacyo”. 

Iryo tangazo rigira riti: “Ku bitaro, Buthelezi yitaweho neza bishoboka ariko birangira ahitanywe n’igikomere. 

“Umuryango wa Buthelezi na BSA bakiriye amagambo meza yo gukomezwa ya minisiteri y’imikino, ubugeni n’umuco.” 

Umutoza Bheki Mngomezulu yavuze ko Buthelezi yari afite amagara meza mbere y’uyu mukino.