DR Congo irifuza kugura intwaro n'indege z'intambara muri Indonesia
Ahavuye isanamu, Ministère de La Défense/RDC
Nyuma y’uruzinduko rwa minisitiri w’ingabo za DR Congo muri Indonesia, ibinyamakuru muri iki gihugu bivuga ko yashimye indege n'intwaro zihakorerwa kandi bifuza kubigura.
Kuwa kane, minisitiri w’ingabo wa DR Congo Jean Pierre Bemba Gombo yari i Jakarta aho yakiriwe na mugenzi we wa Indonesia bakumvikana ku masezerano y’ubufatanye mu bya gisirikare.
Ibiro ntaramakuru Antara bya leta ya Indonesia bivuga ko ubwo bufatanye burimo gahunda yo kugura intwaro zikorerwa muri Indonesia hamwe no gutoreza abasirikare ba ‘cadets’ na ‘special forces’ ba DR Congo muri icyo gihugu cya Aziya.
Minisitiri w’ingabo za Indonesia asubirwamo avuga ko igihugu cye cyiteguye kwakira abo basirikare igihe cyose “guhera mu kwezi gutaha”.
Ibiro bya Jean Pierre Bemba byatangaje amashusho y’uruzinduko yagiriye mu nganda zo muri icyo gihugu zicura intwaro ntoya, inini, ndetse n’ibifaru.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Jean Pierre Bemba - wigeze kuba umukuru w'umutwe w'inyeshyamba muri DR Congo agafungwa imyaka 10 n'urukiko mpuzamahanga mpanabyaha, mu 2016 uru rukiko rwaburijemo igifungo cy’imyaka 18 yari yakatiwe arekurwa mu 2018, muri Werurwe (3)uyu mwaka nibwo yagizwe minisitiri w’intebe wungirije akaba na minisitiri w’ingabo.
DR Congo yugarijwe n’ibibazo by’umutekano mucye, cyane cyane mu burasirazuba ahari imitwe myinshi yitwaje intwaro. Ubushobozi, umuhate, n’ubushake bw’igisirikare cya Congo mu kurwanya iyi mitwe bunengwa n’abasesenguzi batandukanye.
Muri DR Congo hariyo ingabo za ONU n’ingabo z’ibihugu bya Africa y’iburasirazuba zaje gufasha kugarura amahoro, biteganyijwe ko hajya n’ingabo za SADC.
Hari kandi abavuga ko hariyo amatsinda y’abarwanyi b’abacancuro bahawe akazi na leta ya Kinshasa ko gufasha kurwanya inyeshyamba cyane cyane za M23, ibyo leta yahakanye ivuga ko abo yakoranye nabo bo mu mahanga ari inzobere zitanga inama n’ubufasha tekinike mu by’indege za gisirikare.
