Rwanda: Urubanza rwa Vincent Murekezi uregwa jenoside rwasubitswe

Urugereko rw'urukiko rukuru rukorera i Nyanza mu majyepfo y'u Rwanda rwasubitse urubanza rwa Vincent Murekezi wajuririye igihano cy'igifungo cya burundu yakatiwe n'urukiko Gacaca rwa Huye nyuma yo kumuhamya ibyaha bya jenoside.

Murekezi yoherejwe mu Rwanda n'igihugu cya Malawi mu 2019 ngo akurikiranwe kuri ibyo byaha.

Ku isaha ya saa yine n'igice ni bwo Vincent Murekezi yinjiye mu cyumba cy'iburanisha cy'urugereko rw'urukiko rukuru rukorera i Nyanza, ari kumwe n'umwunganira Me Kagame Kimonyo Alex, abanza gusuhuza bacye mu bo mu muryango we bari mu cyumba cy'urukiko.

Kuri uyu wa gatatu ni bwo urubanza rwa Murekezi rwagombaga gutangira kumvwa mu mizi, gusa umwunganira yasabye igihe cyo gutegura urubanza.

Maître (Me) Kagame Kimonyo Alex yasobanuye ko dosiye ya Murekezi ari nini cyane, ko bimusaba igihe cyo kuyitegura neza kugira ngo yinjire mu rubanza mu mizi.

Urukiko rwatanze amezi abiri, urubanza rukaba ruteganyijwe gutangira ku itariki ya 17 y'ukwezi kwa kabiri umwaka utaha.

Ubushinjacyaha bushinja Murekezi kuba ku isonga ry'ubwicanyi mu mujyi wa Butare aho buvuga ko yagaragaye atanga amabwiriza kuri za bariyeri.

Murekezi yari umucuruzi ukomeye muri Malawi aho yari amaze imyaka 19 ndetse ngo akaba yari yaramaze kubona n'ubwenegihugu bwaho.

Yoherejwe mu Rwanda hakurikijwe amasezerano hagati y'ibihugu byombi yo guhererekanya abacyekwaho ibyaha. Hari nyuma yo kugerageza inzira zose zo mu rwego rw'ubutabera asaba ko atakoherezwa mu Rwanda.

Inzego z'ubutabera z'u Rwanda zivuga ko Murekezi icyo gihe yari aje kubanza kurangiriza muri gereza yo mu Rwanda igifungo cy'imyaka ine (cyaburagaho imyaka ibiri) yakatiwe na Malawi ahamijwe ibyaha bya ruswa, ariko ko yanashakishwaga n'u Rwanda kubera uruhare acyekwaho muri jenoside yabaye mu 1994.

Mu mwaka wa 2008 Vincent Murekezi yakatiwe adahari n'urukiko Gacaca rw'umujyi wa Butare – ubu ni umujyi wa Huye – igihano cy'igifungo cya burundu nyuma yo guhamwa n'ibyaha bya jenoside, igihano yajuririye.