Guhagarika Uburusiya 'ntacyo byagezeho' – Perezida wa FIFA Gianni Infantino

Perezida w'impuzamashyirahamwe y'umupura w'amaguru ku isi FIFA yatangaje ko guhagarika amakipe yo mu Burusiya kwitabira amarushanwa mpuzamahanga "nta kintu byagezeho" ndetse ko barimo kureba uko bakuraho ibyo bihano, ibi byahise byamaganwa cyane na Ukraine.

Amakipe yose y'umupira w'amaguru mu Burusiya yahagaritswe mu marushanwa yose ategurwa na FIFA na UEFA kuva muri Gashyantare(2) 2022 ubwo icyo gihugu cyateraga Ukraine.

Gianni Infantino ukuriye FIFA yatangaje ko uko guhagarika aya makipe "nta cyo byazeho" ahubwo "byateye uburakari n'urwango kurushaho".

Yongeyeho ati: "Kwemerera abakobwa n'abahungu bo mu Burusiya kubasha gukina imikino y'umupira w'amaguru mu bindi bice by'Uburayi byafasha".

Mu gusubiza, minisitiri w'imikino wa Ukraine Matvii Bidnyi yatangaje ku rubuga X ko "amagambo ya Gianni Infantino arimo kutigengesera – tutavuze ubwana.

"Avana umupira w'amaguru mu kuri kw'ibiriho birimo no kwica abana."

Yongeraho ati: "Reka nibutse ko kuva Uburusiya bwatera, abakinnyi barenga 650 n'abatoza bishwe n'Abarusiya. Muri bo harimo abakinnyi b'umupira w'amaguru barenga 100".

Nyuma yo kwakira imikino y'igikombe cy'isi cya 2018 Uburusiya bwahaye Infantino umudali wa 'Russian Order of Friendship' awambitswe na Perezida Vladimir Putin.

Gusa Uburusiya, kubera guhagatikwa na FIFA, ntibwabashije kwitabira imikino y'igikombe cy'isi cya 2022 ndetse n'imikino ya Euro 2024 itegurwa na UEFA kandi ntibuzabasha kwitabira igikombe cy'isi cy'uyu mwaka.

Uburusiya ariko ntibwahagaritse burundu gukina imikino mpuzamahanga kuko bukina imikino n'ibindi bihugu bitari iby'iburengerazuba bidakenera uruhushya rwa FIFA na UEFA.

Minisitiri Bidnyi avuga ko "igihe cyose Abarusiya bakomeje kwica abanya-Ukraine no gukoresha siporo nk'igikoresho cya politike, ibendera ryabo n'ibirango by'igihugu cyabo nta mwanya bifite mu bantu bemera ubutabera, ubusugire n'ubworoherane".

Umwaka ushize, Ukraine yanenze impuzamashyirahamwe y'imikino y'abamugaye (International Paralympic Committee) ku cyemezo yafashe cyo gukuraho ibihano yari yarafatiye Uburusiya n'inshuti yabwo Belarus.

Ukraine icyo gihe yavuze ko IPC yemereye Uburusiya "kuzamura amabendera yabwo, yuzuyeho amaraso y'abantu ibihumbi amagana".

Nubwo ibyo bihano byavanyweho na IPC, abakinnyi b'imikino y'abamugaye b'Uburusiya na Beralus ntabwo bazemerwa gukina imikino ya Paralempike yo mu bukonje izaba mu kwezi gutaha.

Nubwo IPC ari yo ireberera iyi mikino Paralempike hari izindi nzego enye(4) zitandukanye zishinzwe imikino itandatu iri mu ikinwa muri iyi mikino izabera i Milan na Cortina d'Amprezzo.

Eshatu muri izo nzego zo zahisemo kugumishaho ibihano ku bakinnyi bava muri biriya bihugu.