CHAN: Umwuzukuru wa Nelson Mandela yateje icuka kibi muri football ya Afrika

Ishirahamwe ry’umupira w’amaguru muri Africa, CAF, ryatanguye amatohoza ku majambo ya poritike yashikirijwe n’umwuzukuru wa Nelson Mandela mu birori vyo kwugurura ihiganwa ry’umupira w’amaguru, CHAN, muri Algeria.

Mw’itangazo, CAF ivuga ko izokwihweza nimba amategeko yashizweho na CAF hamwe n’ishirahamwe ry’umupira w’amaguru kw’isi, FIFA, yarubahirijwe.

Ishirahamwe ry’umupira w’amaguru muri Maroc, Fédération Royale Marocaine de Football (FMRF), ryarungikiye CAF urwandiko rwo kwiyamiriza aya majambo yashikirijwe mu birori vyo kwugurura iri higanwa rya CHAN ku wa gatanu, igenekerezo rya 13 Nzero (1), aho Zwelivelile Mandela yari umushitsi w’iteka wa komite y’igihugu irihagarariye.

Ibi birobi hamwe n’urukino rwugurura iri higanwa, aho Algeria yatsinze Libya 1-0, vyabereye ku kibuga gishasha citiriwe Nelson Mandela ku mugwa mukuru Alger/Algiers.

Kimwe mu vyari muri iri jambo ryiwe, Mandela yavuze ati: "Igihugu ca nyuma kigitwawe bukoloni, Sahara y’Uburengero. Turwane urugamba kugira dukure Sahara y’Uburengero mu gacinyizo”.

Muri iryo kete ryo kwiyamiriza aya majambo ryabonywe na BBC, ishirahamwe FMRF rivuga ko ivyavuzwe kuri Sahara y’Uburengero ata sano bifitaniye n’iri higanwa canke n’umupira w’amaguru muri rusangi, kandi ko ryari iryo kwifatira mu gahanga Maroc.

Sahara y’Uburengero (Sahara Occidentale/Western Sahara) ni akarere gatuwemwo n’abantu bake cane, kakaba gaherereye ku nkengera y’uburaruko bushira uburengero bwa Afrika.

Kahoze gatwarwa bukoloni na Espagne, kakaba kagiye kwigarurirwa na Maroc mu 1975.

Kuva ico gihe, karangwamwo imishamirano y’igihe kirekire ishingiye ku butaka hagati ya Maroc hamwe n’abasangwabutaka b’aba-Saharawi, mu gihe Algeria ishigikiye icipfuzo c’aba-Saharawi co kwikukira.

Imigenderanire hagati ya Maroc na Algeria yaratosekaye cane gushika aho ibi bihugu bibiri bihagarika imigenderanire muri Myandagaro (8) 2021.

Uwu mubano mubi warashitse no muri CHAN gushika aho Maroc yivana mw’ihiganwa kandi ari nayo isanzwe ifise igikombe c’iri higanwa riheruka, inyuma y’aho Algeria, ari nayo yateguye iri higanwa, yankiye umurwi nserukiragihugu wa Maroc, Les Lions de l'Atlas, gufata indege ya Royal Air Maroc yari kubavana i Rabat ikabashikana aho bari gushikira i Constantine .

Hampande y’aya majambo yashikirije kuri Sahara y’Uburengero, uyu mwuzukuru wa Nelson Mandela yarongoye umurwi w’abantu 40.000 baririmba bavuga ngo "rekura Palestine".

Igihe ryatangura amatohoza, ishirahamwe ry’umupira w’amaguru rya Afrika ryavuze riti: "Aya majambo ya poritike si amajambo ya CAF kandi ntiyerekana ivyiyumviro canke ivyipfuzo vya CAF nk’ishirahamwe ataho ryegamiye mu bijanye na poritike”.