Imfungwa eshanu 'ziteje akaga' zatorotse gereza muri Tunisia

Imfungwa eshanu zivugwa ko ari abantu bateje akaga bagendera ku mahame akaze ya kisilamu, zatorotse gereza yo muri Tunisia.

Minisiteri y'ubutegetsi bw'igihugu yatangaje amafoto yabo ndetse isaba abaturage gutanga amakuru ayo ari yo yose bafite mu rwego rwo gukumira "ibikorwa by'iterabwoba".

Kuri paji yayo yo kuri Facebook, minisiteri y'ubutegetsi bw'igihugu yavuze ko izo mfungwa zatorotse gereza ya Mornaguia mu gitondo cyo ku wa kabiri.

Ibiro ntaramakuru Reuters byatangaje ko Ahmed Malki, wafunzwe kubera kwica abanyapolitiki babiri mu 2013, ari umwe muri abo batorotse.

Reuters yatangaje ko uwo unazwi nk'"Umunya-Somalia", yari ari mu gifungo cy'imyaka 24 kubera kwica abanyapolitiki bagendera ku mahame yo gutandukanya idini na politiki, ari bo Chokri Belaid na Mohamed Brahmi.

Ubwo bwicanyi bwo mu 2013 bwashoye Tunisia mu makuba ya politiki, biza kuviramo guverinoma yari iriho kwegura.

Reuters ikomeza ivuga ko muri izo mfungwa zatorotse harimo na Rayd Touati. Abatanze amakuru bo mu rwego rw'umutekano bavuga ko yagize uruhare mu bitero bya mbere birimo urugomo rwinshi cyane byajegeje Tunisia mu myaka 10 ishize.

Tunisia ni yo yavukiyemo inkubiri y'impinduramatwara zo mu bihugu by'Abarabu yamenyekanye nka Arab Spring (Printemps Arabe), ubwo mu 2011 Tunisia yahirikaga umutegetsi wayo wari umaze imyaka 23 ku butegetsi, Zine al-Abidine Ben Ali.

Ariko ubu Tunisia yibasiwe n'akaduruvayo muri politiki, mu gihe Perezida Kais Saied akomeje gushaka kwiharira ubutegetsi bwose.

Kimwe mu bitero bibi cyane muri Tunisia cyabaye mu mwaka wa 2015, ubwo umugabo witwaje imbunda yarasaga ku bakerarugendo bari bari i Port El Kantaoui, ahantu ho kuruhukira hazwi cyane ho mu majyaruguru y'umujyi wa Sousse, yica abantu 38.