Zelensky avuga ko Bakhmut itigaruriwe n'Uburusiya

    • Umwanditsi, Tessa Wong, James Waterhouse & Oliver Slow
    • Igikorwa, BBC News, i Hiroshima, Kyiv, London

Perezida wa Ukraine Volodymyr Zelensky yashimangiye ko Bakhmut "itigaruriwe" n'Uburusiya nubwo itsinda ry'abacanshuro rishyigikiwe n'Uburusiya ryavuze ko ryayigaruriye.

Perezida wa Ukraine yabivugiye mu ruzinduko i Hiroshima mu Buyapani, mu nama y'itsinda ry'ibihugu birindwi bikize cyane ku isi rizwi nka G7.

Mbere yaho, Yevgeny Prigozhin yashinze itsinda ry'abacanshuro rya Wagner yari yavuze ko iri tsinda ryigaruriye uyu mujyi wo mu burasirazuba bwa Ukraine.

Ariko abo mu gisirikare cya Ukraine babwiye BBC ko igisirikare cya Ukraine kikigenzura inyubako nkeya zo mu nkengero y'uwo mujyi.

Mu kiganiro n'abanyamakuru ku munsi wa nyuma w'iyo nama ya G7, Zelensky yanze gutanga amakuru arambuye y'uko ibintu bimeze.

Ariko yavuze ko uwo mujyi, kuva mu kwezi kwa Kanama (8) umwaka ushize uberamo urugamba rwa mbere rumaze igihe kirekire kandi rwiciwemo abantu benshi cyane muri iyi ntambara, "utigaruriwe" n'Uburusiya "kugeza uyu munsi".

Yongeyeho ati: "Nta bisobanuro [bindi] bibiri cyangwa bitatu kuri ayo magambo".

Ni nyuma yuko mbere hari habayeho urujijo ku magambo ye ku kuntu ibintu bimeze muri uwo mujyi.

Skip Ibisomwa cane and continue reading
Ibisomwa cane

End of Ibisomwa cane

Mu butumwa bwa videwo yatangaje ku wa gatandatu ni ho Prigozhin washinze Wagner yavugiye ko abarwanyi be – bayoboye igitero cy'Uburusiya kuri Bakhmut – bamaze kwigarurira byuzuye uwo mujyi.

Zelensky yagereranyije Bakhmut na Hiroshima, yagabweho igitero cy'igisasu kirimbuzi mu ntambara ya kabiri y'isi, asezeranya "kongera kubaka" igihugu cye nkuko Ubuyapani bwabigenje.

Mbere yaho ku cyumweru, yasuye urwibutso rw'amahoro rwa Hiroshima Peace Memorial Park ari kumwe na Minisitiri w'intebe w'Ubuyapani Fumio Kishida – aho Leta Zunze Ubumwe z'Amerika zasutse igisasu kuri uwo mujyi mu 1945.

Zelensky yahashyize indabo mu kwibuka abiciwe muri icyo gitero.

Nyuma yo guhura na Kishida, yateye intambwe yerekeza mu cyumba cy'inama cy'urwo rwibutso rw'amahoro, kuganira n'abanyamakuru.

Ubwo yinjiraga, umunyamakuru umwe w'umugore yateye hejuru agira ati: "Slava Ukraini [Icyubahiro kuri Ukraine]". Zelensky yikirije n'umutwe yemeranya na we.

Zelensky yagiye atanga ingero nyinshi z'aho Hiroshima ihuriye na Ukraine, avuga ko amafoto y'uwo mujyi wo mu Buyapani nyuma yuko wari umaze kuraswaho igisasu, amwibutsa Bakhmut y'uyu munsi.

Yasezeranyije ko hazabaho "kongera kubaka" Ukraine nk'uko byagenze ku Buyapani.

Yagize ati: "Ubu Hiroshima yongeye kubaka umujyi wayo, kandi dufite inzozi zo kongera kubaka imijyi yacu".