Libya: Inzu ya 'Mayor' yatwitswe mu myigaragambyo ishingiye ku myuzure

Urugo rw'umukuru w'umujyi (Mayor) wa Derna mu burasirazuba bwa Libya rwatwitswe, mu gihe abigaragambya babarirwa mu magana basabaga ibisubizo ku myunzure ikaze yabaye mu cyumweru gishize.

Ku wa mbere nijoro bateraniye ku musigiti uzwi cyane wa Sahaba wo muri uwo mujyi, benshi bavugira hejuru basaba ko abategetsi bo muri guverinoma yo mu burasirazuba bwa Libya birukanwa.

Abagize akanama k'ubuyobozi bw'umujyi wa Derna ubu bose bamaze kwirukanwa.

Umuyoboro wa internet hamwe n'umurongo wa telefone na byo byakuweho, ndetse, mu gikorwa cyo guhashya itangazamakuru, abanyamakuru bategetswe kuhava.

Abantu barenga 10,000 ni bo batangajwe n'abategetsi ko baburiwe irengero, nyuma yuko ingomero ebyiri zari zarangiritse zituritse nyuma y'imvura nyinshi, amazi agateza imyuzure muri uwo mujyi.

Imibare yatanzwe y'abazwi ko bapfuye ikomeje gutandukana cyane, ariko Umuryango w'Abibumbye (ONU/UN) uvuga ko wemeje ko abantu hafi 4,000 bishwe n'iyo myuzure.

Ubu ONU ivuga ko rimwe mu matsinda yayo ryimwe uruhushya rwo kwinjira mu mujyi wa Derna.

Najwa Mekki, wo mu ishami rya ONU rishinzwe guhuza ibikorwa by'ubutabazi (OCHA), ku wa kabiri yabwiye ibiro ntaramakuru Reuters ati:

"Dushobora kwemeza ko amatsinda yo gushakisha no gukora ubutabazi, amatsinda y'ubuvuzi bwihuse hamwe na bagenzi bacu bo muri UN basanzwe bari i Derna bakomeje gukora.

"Ariko itsinda rya UN uyu munsi [ejo ku wa kabiri] ryari ryitezwe kwerekeza i Derna rivuye i Benghazi ariko ntiryahawe uruhushya rwo kujyayo."

Urugo rwa Mayor w'umujyi wa Derna, Abdulmenam al-Ghaithi, ni rwo abaturage batuye uburakari bwabo.

Abaturage bavuga ko abategetsi batababuriye bihagije, ndetse bavuga ko abategetsi bagomba kuba bari basanzwe babizi ko hitezwe kugwa imvura nyinshi.

Banavuga ko abategetsi bababuriye babasaba kuguma mu ngo zabo, aho kubasaba guhunga, nubwo abategetsi ibi babihakana.

Kuva Muammar Gaddafi, umutegetsi wa Libya w'igihe kirekire, yahirikwa akanicwa mu 2011 bigizwemo uruhare n'ibihugu bimwe byo mu burengerazuba bw'isi, Libya yugarijwe no guhanganira ubutegetsi.

Kuri ubu, Libya irimo guverinoma ebyiri – iyemewe na ONU ifite icyicaro mu murwa mukuru Tripoli, n'indi yo mu burasirazuba bw'igihugu ishyigikiwe na Jenerali Khalifa Haftar.

Gen Haftar yakomeje kuvuga ko iyo myuzure ari ikiza kamere, ariko Abanya-Libya benshi ntibemeranya na we, bavuga ko guverinoma yo mu burasirazuba yirengagije izo ngomero, nubwo yari yaraburiwe ko zidakomeye.

Avugira aho ari ku gitanda cyo mu bitaro by'i Benghazi, Abdelqader al-Omrani, w'imyaka 48, yabwiye ibiro ntaramakuru AFP ko we n'abandi baturage baba hafi y'izo ngomero bari baraburiye "ubutegetsi bw'umujyi dusaba ko zisanwa", nyuma yuko mu myaka ibiri ishize babonye ko ziva.

Ati: "[Ubu] Impfu zacu ziri kubakomanga ku mitima yabo."

Abahanga muri siyansi bo mu kigo cyo ku rwego rw'isi cyiga ku kirere, World Weather Attribution, bavuze ko intambara yabaye muri Libya hamwe no kutitabwaho kw'izo ngomero, byatumye ikirere kibi cyane gihinduka ikiza cyibasira abaturage, ariko bavuga ko imvura y'inyongera ya 50% yaguye cyane mu burasirazuba bwa Libya kubera ubushyuhe bukabije ku isi bwatewe n'ibikorwa bya muntu.