M23 yafashe ikibuga c'indege ca Kavumu mu buseruko bwa RDC

Umuhari M23 urwanira mu buseruko bwa Republika ya demokarasi ya Congo wafashe ibisagara n'ikibuga c'indege bikukirira umuji wa Bukavu.

Uwo mugwi wegereje Bukavu mu gihe mu makungu bakomeza gutera akamo basaba agahengwe no gusubira mu biganiro vy'amahoro.

Umugwi M23 ntivyawugoye kwinjira muri ivyo bibanza bishasha wafashe.

Igisirikare ca Congo n'abarwanyi bagishigikiye baciye bakinjura batarinze kurwana cane aho ku kibuga c'indege ca Kavumu.

Bamwe mu batuye mu muji babwiye BBC ko hakomeje kuzamuka umwuka w'ubwoba no guhangayika. Abategetsi babwiye abanyagihugu kuguma mu mazu.

Abo barwanyi ba M23 bashigikiwe n'Urwanda, bariko basatira berekeza mu muji wa Bukavu.

Icegera ca bulamatari wa Kivu y'epfo yabwiye BB ko hari intambara zikomeye hagati y'igisirikare n'umugwi M23 mu micungararo ya Bukavu

Jean Elekano, yabwiye BBC ko igisirikare arico kikigenzura umuji wa Bukavu, aho 'kiriko kiragwanya umugwi ushigikiwe n'Urwanda'.

Yagize ati: "Biragaragara neza ko (Paul) Kagame n'abo bafatanije bo mu mugwi M23 binjiye muri Republika ya Demokarasi ya Congo. Turiko turabarwanya".

Urwanda rukomeza guterwa igitutu rusabwa gukura ingabo zarwo mu buseruko bwa Congo, kandi rubuze n'umuhari M23 gukomeza kwigarurira uturere dushasha.

Ariko perezida Paul Kagame yavuze ko ikimuraje ishinga ubwa mbere ari umutekano.

Avuga ko Urwanda rugeramiwe n'abarwanyi b'umutwe wa FDLR bari muri Congo, kandi yimye agaciro igabisha iryo ariryo ryose ry'ibihano.

Ubutegetsi bwa Kinshasa buvuga ko ubutegetsi bwa Kigali bwigaruriye igice c'ubutaka bwa Congo kiriwo ubutunzi bw'amabuye y'agaciro.

Abantu baharugwa mu bihumbi barataye izabo muri izi ndwi zishize, kubera awo muhari M23 ukomeza gufata uturere dushasha.