US: Umugabo warashe abantu yibasiye ku bushake ahiganje abirabura – Mayor

Abategetsi bavuga ko umugabo wo muri Amerika ucyekwaho kwica arashe abantu 10 mu iduka rinini ryo mu mujyi wa Buffalo muri leta ya New York, yahisemo ku bushake ahantu hatuwe n'abirabura benshi.

Polisi ivuga ko Payton Gendron, w'imyaka 18, yatwaye imodoka agenda intera ya kilometero zirenga 320 kugira ngo agere aho yakoreye icyo gitero.

Icyo gitero kirimo gukorwaho iperereza nk'igikorwa cy'urugomo rushingiye ku buhezanguni bw'irondabwoko.

'Mayor' w'umujyi wa Buffalo Byron Brown yavuze ko uwo ucyekwa yahageze ashaka guhitana "ubuzima bwinshi bushoboka bw'abirabura".

Inyandiko y'amapaji 180 isa nkaho yanditswe na Gedron yagiye ahagaragara, aho yivuga ko ari umuhezanguni ugendera ku mahame yuko abazungu bafite agaciro gasumba ak'abandi bantu.

Harimo kwibazwa ukuntu yashoboye gukora icyo gitero, mu gihe hari haragaragajwe impungenge kuri we. Guverineri wa leta ya New York Kathy Hochul yabwiye igitangazamakuru ABC News ati: "Ndashaka kumenya ibyo abantu bari bazi n'igihe babimenyeye".

Joseph Gramaglia, umukuru wa polisi i Buffalo, yabwiye abanyamakuru ku cyumweru ko Gendron "yateje inkeke mu buryo bwo muri rusange" ubwo yari akiri mu ishuri ryisumbuye.

Yamaze umunsi umwe n'igice mu bitaro akorerwa isuzumwa ry'ubuzima bwo mu mutwe, ariko nyuma ararekurwa.

Bisa nkaho atakomeje gukurikiranirwa hafi n'abategetsi.

Hagati aho, umushinjacyaha mukuru wa New York Letitia James yavuze ko ibiro bye bigiye kwibanda ku nyandiko z'ubuhezanguni zo ku mbuga za internet.

Yagize ati: "Iki gikorwa cyakozwe n'umuntu uteye ishozi, wataye umutwe, buri munsi wahoraga yihata indyo y'urwango".

Uko kurasa kwatumye abahatuye bagwa mu kantu. Umwe mu bari bitabiriye ikiriyo ku cyumweru yabwiye ibiro ntaramakuru Reuters ati: "Birakomeretsa, impamvu umuntu yakora ibi".

Mu bantu 13 barashweho, polisi yavuze ko 11 muri bo ari abirabura.

Mu batangajwe ko bishwe harimo umugabo wari urimo agura umutsima (cake) w'umwana we w'umuhungu wizihizaga isabukuru ye y'amavuko, n'umugore wari wagiye guhaha nyuma yo gusura umugabo we mu nzu yita ku bageze mu zabukuru.

Igitero cyagenze gute?

Uwagabye igitero - wari wambaye nk'umusirikare - yatwaye imodoka ayigeza ahaparikwa imodoka ku iduka rinini rya Tops Friendly Market, hafi saa munani n'iminota 30 z'amanywa (14h30) ku isaha yaho.

Atangira gutangaza icyo gitero kuri internet mu gihe cyarimo kuba.

Ushinzwe umutekano yarashe amasasu menshi yo gusubiza uwateye, ariko ikoti ridatoborwa n'amasasu uwo mugabo yari yambaye ryahagaritse isasu rimwe ryamuhamije, nkuko polisi yabivuze.

Nuko yica uwo ushinzwe umutekano, yinjira muri iryo duka arasa abandi bantu.

Gendron yatawe muri yombi nyuma y'icyo gitero, ahakana ibirego by'ubwicanyi.

Ababibonye bavuze ukuntu byari biteye ubwoba.

Umwe yagize ati: "Byari nk'inzozi ziteye ubwoba... ibi ubibona kuri televiziyo, ubyumva kuri televiziyo... ariko nta na rimwe nigeze ntekereza ko naba umwe buri bo [umwe mu bo bibayeho]".

Perezida w'Amerika Joe Biden yavuze ko uko byagenze bikirimo gukorwaho iperereza, ariko yamaganye bikomeye ubuhezanguni bushingiye ku irondabwoko.

Yagize ati: "Twese tugomba gukorera hamwe mu gukuraho urwango rukiri icyasha kuri roho y'Amerika".

Mu itangazo rya nyuma yaho, ibiro bye bya White House byatangaje ko Biden n'umugore we Jill ku wa kabiri bazakorera uruzinduko i Buffalo bagahura n'abahatuye.

Byibazwa ko icyo gitero cyo ku wa gatandatu ari ko kurasa abantu mu kivunge kubi cyane kubayeho muri Amerika kugeza ubu muri uyu mwaka wa 2022.

Buri mwaka, muri Amerika impfu zigera ku 40,000 zigirwamo uruhare n'imbunda - umubare urimo no kwiyahura. Kurasa abantu mu kivunge nabyo bikunze kubaho.