DR Congo: Umusirikare wa MONUSCO wo muri Nepal yishwe n'inyeshyamba

Ingabo za MONUSCO zatangaje ko undi musirikare wazo yishwe mu gitero cy'inyeshyamba mu ntara ya Ituri mu burasirazuba bwa DR Congo.

Ibi bikurikiye abasirikare umunani b'izi ngabo baherutse gupfira mu ndege yahanuriwe i Chanzu muri Rutshuru ahaberaga imirwano y'ingabo za leta n'inyeshyamba za M23 mu cyumweru gishize.

MONUSCO ivuga ko uwo musirikare wiciwe mu gitero cya Ituri kuwa kabiri akomoka muri Nepal.

ONU ivuga ko iki gitero ku ngabo zayo cyakozwe n'abakekwa ko ari inyeshyamba za CODECO ahitwa Bali mu karere ka Djugu.

Antonio Guterres umunyamabanga mukuru wa ONU hamwe n'inama yayo ishinzwe umutekano ku isi bamaganye iki gitero gishya.

Umuvugizi wa Guterres witwa Farhan Haq yabwiye abanyamakuru ko "yibutsa ko ibitero ku ngabo z'umuryango w'abibumbye bishobora kugira ibyaha by'intambara".

Farhan avuga ko Guterres yasabye abategetsi ba DR Congo gukora iperereza kuri iki gitero no "kugeza abagikoze mu bucamanza vuba."

Iki gitero kibaye mu gihe iperereza ku iraswa rya kajugujugu ya MONUSCO i Chanzu mu cyumweru gishize ritaravuga abayirashe.

Ingabo za leta n'umutwe wa M23 buri ruhande rwashinje urundi kurasa iyo ndege.

MONUSCO ifite ingabo zoherejwe kubungabunga amahoro muri aka gace zirenga 15,000, nizo nyinshi za ONU ziri ahantu runaka ku isi.

Abatuye mu burazirazuba bwa DR Congo bakomeje kunenga umusaruro wa MONUSCO - iherutse kongererwa igihe kugeza mukwa 12/2022 - basaba ko ubutumwa bwayo burangizwa.