Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Russia iri gukora jenoside muri Ukraine – ibivugwa na Minisitiri w'intebe wungirije
Minisitiri w'intebe wungirije wa Ukraine yashinje Uburusiya gukora ibikorwa bya "jenoside" mu gitero bwagabye ku gihugu cye.
Avuga mu kiganiro cyitwa Sophy Ridge cyo kuri televiziyo Sky, Olha Stefanishyna yavuze ko "rwose yemera" ko ibikorwa bya jenoside byakozwe n'ubutegetsi bw'Uburusiya, anavuga ko Perezida Vladimir Putin n'abategetsi bo mu biro bye bya Kremlin "bakoze ibyaha byo mu ntambara".
Stefanishyna yavuze ko umubare w'"abasivile bishwe" hamwe n'uw'abakomerekeye mu gitero cy'Uburusiya "uruta cyane uw'ingabo za Ukraine", anavuga ko "abagore bafashwe ku ngufu mu gihe cy'amasaha nyuma bicwa" n'abasirikare b'Uburusiya.
Ariko yasezeranyije ko "Ukraine izirwanaho kugeza igihe cyose gicyenewe", anavuga ko umushinjacyaha wa rubanda w'igihugu cye azashaka uko ashyiriraho ibirego ingabo z'Uburusiya zicyekwaho ibyaha byo mu ntambara. Yavuze ko ibirego bigera ku 2,000 byamaze gutangizwa.
Yanashimye abategetsi ba Turukiya na Israel ku ruhare rwabo mu gushaka gutuma hagerwa ku masezerano y'amahoro, ariko aburira ko Ukraine itazemera umuti uwo ari wo wose watuma Uburusiya bwigarurira ubutaka bwayo, icyo yavuze ko ari "umurongo utukura [ntarengwa]" w'igihugu cye mu biganiro.
Ariko yavuze ko hashobora kubaho umwanya wo kuganira ku "gusubirana [kongera kwakira]" uturere two mu burasirazuba dushaka ubwigenge, tumaze imyaka umunani "twarigaruriwe".
