Ukraine: Macron avuga ko Putin yamwizeje ko nta kwiyongera kundi kw'ubushyamirane kuzabaho

Perezida w'Ubufaransa Emmanuel Macron yabwiye abanyamakuru ko Perezida w'Uburusiya Vladimir Putin yamwizeje ko ingabo z'Uburusiya zitazongera amakuba hafi y'imipaka ya Ukraine.

Mbere yo kugirana ibiganiro na Perezida wa Ukraine, Bwana Macron yagize ati: "Nageze ku kwizezwa ko nta guhuhuka cyangwa kwiyongera kuzabaho".

Ariko, Uburusiya bwavuze ko ikintu icyo ari cyo cyose cyo kumvikanisha ko uko ari ko bizagenda nta kabuza, "si cyo".

Uburusiya bwahakanye buvuga ko nta gahunda bufite yo gutera Ukraine, ariko bwakusanyirije abasirikare barenga 100,000 hafi y'imipaka yabwo.

Abategetsi bo muri Amerika bemeza ko Uburusiya bumaze kwegeranya ubushobozi bwa gisirikare ku kigero cya 70% cy'ubucyenewe mu kugaba igitero cyeruye.

Ubu bushyamirane hagati y'Uburusiya, Ukraine n'ibihugu by'i Burayi n'Amerika, bubaye mu gihe hashize hafi imyaka umunani Uburusiya bwiyometseho umwigimbakirwa wa Crimea wo mu majyepfo ya Ukraine.

Uburusiya bushinja leta ya Ukraine kunanirwa gushyira mu bikorwa amasezerano ya Minsk (umurwa mukuru wa Belarus) - amasezerano mpuzamahanga yatewe inkunga n'Ubudage n'Ubufaransa yo kugarura amahoro mu burasirazuba bwa Ukraine, aho inyeshyamba zishyigikiwe n'Uburusiya zigenzura igice kinini cy'ako karere, ndetse kuva mu mwaka wa 2014 hamaze kwicirwa abantu batari munsi ya 14,000.

Putin yasabwe kwerekana 'ingamba zifatika'

Muri iki cyumweru, Perezida Macron ari mu bikorwa bya diplomasi, agera mu mirwa mikuru y'ibihugu bimwe. Ku wa kabiri ni bwo yageze mu murwa mukuru Kyiv wa Ukraine, nyuma yuko ku wa mbere amaze amasaha hafi atandatu ari mu biganiro na Bwana Putin mu murwa mukuru Moscou w'Uburusiya.

Mu kiganiro n'abanyamakuru ari kumwe na Perezida wa Ukraine Volodymyr Zelensky, Bwana Macron yavuze ko ubu noneho hari amahirwe yo "gutuma ibi biganiro bitera intambwe" hagati y'Uburusiya na Ukraine, kandi ko ubu ashobora kubona ko hari "ibisubizo bifatika" mu kugabanya ubushyamirane.

Hagati aho, Bwana Zelensky yasabye Bwana Putin gufata ingamba zihamye mu kugabanya ubushyamirane. Yagize ati: "Rwose sinjya nizera amagambo, nemera ko buri munyapolitiki ashobora gukorera mu mucyo afata ingamba zifatika".

Bwana Macron yahise afata indege yerekeza mu murwa mukuru Berlin w'Ubudage, aho yifatanyije n'abategetsi b'Ubudage na Pologne (Poland) mu kuvuga ko bashyigikiye ubusugire bwa Ukraine.

Aba bategetsi bahuye mu rwego rw'inama y'itsinda Weimar Triangle - rihuriwemo n'Ubufaransa, Ubudage na Pologne - ryashinzwe mu myaka 31 ishize nyuma y'intambara y'ubutita, mu gufasha guhangana n'ibibazo byugarije Uburayi.

Ku wa mbere, Bwana Putin yumvikanishije ko bimwe mu byo Bwana Macron yasabye "bishobora kuba umusingi w'izindi ntambwe zihuriweho" - nubwo "bishoboka ko hakiri kare cyane kuzivugaho".

Umutegetsi wo mu Bufaransa nyuma yabwiye abanyamakuru ko aba bategetsi bombi bemeranyijwe ko Uburusiya buzakura abasirikare babwo muri Belarus ku musozo w'imyitozo ibera hafi y'imipaka ya Ukraine yo mu majyaruguru.

Ariko, Dmitry Peskov, umuvugizi wa Kremlin (ibiro bya Perezida w'Uburusiya), yahakanye avuga ko nta masezerano n'amwe yagezweho - nubwo yavuze ko abo basirikare bitezwe gusubira mu Burusiya mu gihe runaka.

Ibikorwa bya diplomasi bya Perezida Macron nyuma byamwerekeje i Berlin mu nama n'umukuru w'Ubudage Olaf Scholz, na Perezida wa Pologne Andrzej Duda.