Omicron: Inama ikomeye ku ishoramari rya Africa yasubitswe kubera iyi virus

Ba Perezida Paul Kagame, Felix Tshisekedi, Samia Suluhu, Nana Akufo- Ado na Cyril Ramaphosa bari bemeje kwitabira iyi nama yari kubera i Abidjan bahise bahagarika kujyayo.

Byari ugutungurwa no kuvangirwa ku ntumwa z'ibihugu zigera ku magana zamaze kugira i Abidjan muri Cote d'Ivoire mu nama ya Africa Investment Forum yari gutangira kuwa gatatu tariki 01 Ukuboza (ukwa 12).

Perezida wa Banki Nyafurika itsura amajyambere (AfDB), Akinwumi Adesina, yavuze ko umubare munini w'abantu bari kwitabira bavuye mu bihugu bitandukanye batabashije kuza i Abidjan kubera ibibazo mu ngendo z'indege bitewe n'ubwoko bushya bwa Covid, Omicron.

Umunyamakuru wa BBC wari wagiye muri iyi nama i Abdjan avuga ko abantu b'ingenzi, nk'abashoramari n'abanyamigabane muri AfDB, batashoboye kuza i Abidjan nk'uko byari biteganyijwe, ariyo mpamvu iyi nama yasubitswe.

Abakuru b'ibihugu by'u Rwanda, DR Congo, Tanzania, Ghana na Africa y'Epfo bari bemeje kuza muri iyi nama nabo bahise babihagarika kujyayo, nk'uko uyu munyamakuru abivuga.

Imishinga 47 y'ishoramari yari kuzigwaho muri iyi nama y'uyu mwaka.

Iyo irimo umushinga wa gari ya moshi muri Africa y'iburasirazuba, umushinga w'uruganda rukora inkingo muri Africa, n'umuhanda mugari (highway) wa Lagos - Abidjan.

Nibura miliyari 110 z'amadorari ya Amerika byari byitezwe ko zizemerwa n'abafatanyabikorwa banyuranye muri iyi nama.

Iyi nama, ubusanzwe iba buri mwaka, iheruka kuba mu 2019, iya 2020 yarasubitswe kubera Covid-19.