Rwanda: Umukinnyi watsinze igitego cy’Amavubi muri Kenya yahagaritswe "kubera imyitwarire mibi"

Ishyirahamwe ry'umupira w'amaguru mu Rwanda, FERWAFA, ryatangaje ko umukinnyi w'ikipe y'igihugu Olivier Niyonzima yahagaritswe igihe kitazwi muri iyi kipe "kubera imyitwarire idahwitse", amakuru avuga ko atatahanye n'abandi nyuma y'umukino batsinzwemo na Kenya i Nairobi.

Niyonzima, umukinnyi wo hagati wa AS Kigali, kuwa mbere yatsindiye Amavubi igitego kimwe mu mukino batsinzwemo na Kenya 2 - 1 mu matsinda yo gushaka ticket y'igikombe cy'isi cya 2022.

Ikipe y'u Rwanda imaze igihe itishimiwe n'abafana b'umupira w'amaguru kubera umusaruro mubi muri iki gihe.

Idatatangaje iyo myitwarire idahwitse, FERWAFA yanditse kuri Twitter ko "itazihanganira uwo ari we wese uzagaragaza imyitwarire mibi" mu ikipe y'Amavubi.

Ibi byatumye hari abakunzi b'umupira w'amaguru bongera kugaragaza ko batishimiye iyi kipe n'umusaruro wayo.

Amakuru agera kuri BBC avuga ko Niyonzima yirukanywe kubera ibikorwa bwite yagiyemo hanze ya hoteli bacumbikiwemo i Nairobi atabiherewe uburenganzira, nyuma y'umukino batsinzwemo na Kenya.

Umwe mu bantu ba hafi muri FERWAFA utifuje gutangazwa yabwiye BBC ko Niyonzima agarutse yangiwe kwinjira mu bandi bakinnyi aho bari muri hoteli i Nairobi bitegura gufata indege isubira i Kigali mu gitondo kuwa kabiri.

Ati: "Ubu byabaye ngombwa ko asigara i Nairobi aho ari gushaka uko ahinduza ticket y'indege agataha nimugoroba."

Niyonzima uzwi ku izina rya Sefu, ntacyo aratangaza kuri iki cyemezo cya FERWAFA cyo kumuhagarika mu ikipe y'igihugu.

Amavubi ni aya nyuma mu itsinda E ryo gushaka ticket yo guhagararira Africa mu gikombe cy'isi cya 2022 muri Qatar, amaze gukina imikino itandatu, yatsinzwe itanu, anganya rimwe.

Kuva uyu mwaka watangira, Amavubi amaze gukina imikino yose hamwe 13, yatsinze itatu itsindwa itandatu, isigaye irayinganya.

Umusaruro w'Amavubi n'ibibazo bitandukanye byagiye bivugwa muri FERWAFA byatumye abakunzi b'umupira w'amaguru kenshi banenga iyi kipe y'igihugu, ndetse benshi bagaragaje kwibaza impamvu Niyonzima yirukanywe muri iyi ikipe.

Sefu yari akwiye guhanwa, ariko ikibazo si we

Rodrigue Mukama umwe mu bakurikirana umupira w'amaguru mu Rwanda yabwiye BBC ko ibyo FERWAFA yakoze byerekana ko "hari ikibazo mu micungire y'ikipe y'igihugu".

Yavuze ko mbere y'uko iyi kipe ijya muri Kenya Haruna Niyonzima umwe mu bakinnyi bayo bakomeye yavuye muri bagenzi be agasezera avuga ko yapfushije umuntu.

Ati: "Bageze muri Kenya, rutahiramu Raphael York nawe yavuye mu bandi yisubirira iwabo muri Sweden adakinnye, nyuma y'inkuru nyinshi FERWAFA yavuze ko nawe yapfushije umuntu bikaba ngombwa ko agenda.

"Aho hose FERWAFA ntiyagiye isobanurira ku gihe abakunzi b'ikipe y'Amavubi ibiri kuba, bigatera inkuru z'impuha ku biri kubera mu ikipe y'igihugu.

"Sefu koko ashobora kuba yakoze amakosa kandi guhana amakosa birakwiriye, ariko uburyo FERWAFA ihise ibivuga ubu ni ugushaka icyo abantu baba bavuga, ntibatinde cyane ku kuba Amavubi yarabonye inota rimwe mu manota 18 twagombaga gukorera muri iyi 'campaign' [y'igikombe cy'isi 2022]."

Yongeraho ati: "Ni ukugira ngo bibe nk'aho Sefu ari we kibazo ubu, abantu ntibatekereze ku kibazo cy'uko u Rwanda ruri gutsindwa umusubirizo."