Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
China: Perezida Xi Jinping avuga ko 'kongera kwihuza' na Taiwan bigomba kugerwaho
Mu ijambo yashyikirije, Perezida w'Ubushinwa Xi Jinping yavuze ko "kongera kwihuza" na Taiwan "bigomba kugerwaho".
Bwana Xi yongeyeho ko uko kwihuza gukwiye kugerwaho mu mahoro, ariko aburira ko Abashinwa bazwiho kugira "umugenzo uteye ishema" wo kutemerera abashaka kwitandukanya na bo.
Mu gusubiza, ibiro bya Perezida wa Taiwan byavuze ko ejo hazaza h'icyo kirwa (izinga mu Kirundi) hari mu biganza by'abaturage bacyo.
Taiwan yifata nka leta yigenga. Ariko Ubushinwa bufata Taiwan nk'intara yabwikuyeho.
Ubushinwa ntibwigeze bukuraho ko inzira y'ingufu ishobora gukoreshwa mu kugera kuri uko kwihuza.
Bwana Xi avuze ayo magambo nyuma yuko mu minsi ikurikiranye mu cyumweru gishize indege za gisirikare z'Ubushinwa zigera hafi ku 150, za mbere nyinshi kugeza ubu, zigurukiye mu karere k'ubwirinzi bwo mu kirere ka Taiwan.
Abasesenguzi bamwe bavuga ko izo ngendo z'indege z'Ubushinwa zishobora kubonwa nk'ukuburira bwahaye Perezida wa Taiwan mbere yuko iki kirwa cyizihiza umunsi w'igihugu ku cyumweru.
Minisitiri w'ingabo wa Taiwan yavuze ko ubushyamirane n'Ubushinwa buri ku kigero cya mbere kibi cyane mu myaka 40 ishize.
Ariko ijambo rye ryo kuri uyu wa gatandatu, avuze ku isabukuru y'imyaka 110 ishize habaye impinduramatwara yahiritse umuryango wa cyami wa nyuma mu Bushinwa mu 1911, ryumvikanyemo gushaka ubwiyunge kurusha irikomeye yaherukaga kuvuga kuri Taiwan mu kwezi kwa karindwi.
Mu ijambo ry'icyo gihe, yasezeranyije "gushwanyaguza" amagerageza ayo ari yo yose agamije kwemera ku mugaragaro ubwigenge bwa Taiwan.
Mu ijambo rye ryo kuri iyi nshuro, Bwana Xi yagize ati: "Igikorwa cy'amateka cyo kongera guhuza byuzuye igihugu cy'amavuko kigomba kugerwaho, kandi nta gushidikanya kizagerwaho".
Yavuze ko kwihuza "mu buryo bw'amahoro" ari byo "bijyanye cyane n'inyungu rusange y'igihugu cy'Ubushinwa, harimo n'abo dusangiye igihugu bo muri Taiwan".
Ariko yongeyeho ati: "Nta muntu n'umwe ukwiye gusuzugura umuhate ushimitse [udatezuka] w'abaturage b'Ubushinwa, ugushaka gukomeye, n'ubushobozi bukomeye bwo kurwana ku busugire bw'igihugu no kutavogerwa k'ubutaka [bwabwo]".
Bwana Xi yavuze ko ashaka kubona habaho kwihuza binyuze muri gahunda y'"igihugu kimwe cy'uburyo [ubutegetsi] bubiri", isa nk'ikoreshwa muri Hong Kong, iyi ikaba ibarirwa mu Bushinwa ariko ikagira ubwigenge buri ku kigero cyo hejuru.
Yongeyeho ati: "Gahunda igamije ubwigenge bwa Taiwan ni yo mbogamizi ya mbere ikomeye ku kugera ku kongera guhuza igihugu cyacu cy'amavuko, kandi ni na yo byago bya mbere bikomeye byihishe bibangamiye kuvugurura igihugu".
Ariko ibiro bya Perezida wa Taiwan byavuze ko ibitekerezo by'abaturage bisobanutse neza mu kwamagana gahunda y'igihugu kimwe kirimo ubutegetsi bubiri. Byashishikarije Ubushinwa kureka "ingamba z'ubushotoranyi zo kwivanga, kujujubya no gusenya".
Mbere gato y'iryo jambo Bwana Xi yavugiye mu murwa mukuru Beijing, Minisitiri w'intebe wa Taiwan Su Tseng-chang yashinje Ubushinwa "kurata imitsi [imbaraga]" no guteza ubushyamirane.
Ubushinwa na Taiwan: Iby'ibanze
- Kuki Ubushinwa na Taiwan bifitanye umubano mubi? Ubushinwa na Taiwan byatandukanyijwe mu gihe cy'intambara yo gusubiranamo kw'abaturage yo mu myaka ya 1940, ariko Ubushinwa bushimangira ko icyo kirwa hari igihe kizagera bukacyisubiza, no ku ngufu bibaye ngombwa
- Taiwan itegetswe gute? Iki kirwa gifite itegekonshinga ryacyo, abategetsi batowe binyuze mu buryo bwa demokarasi, ndetse gifite ingabo zigizwe n'abasirikare hafi 300,000
- Ni nde wemera Taiwan? Ibihugu bicyeya gusa ni byo byemera Taiwan. Byinshi byemera leta y'Ubushinwa. Amerika nta mubano uzwi ifitanye na Taiwan, ariko ifite itegeko riyisaba guha icyo kirwa ubushobozi bwo kwirinda ubwacyo.
Nubwo mu byumweru byinshi bishize habayeho kwiyongera kw'ubushyamirane, umubano w'Ubushinwa na Taiwan nturazahara ku kigero uheruka kugeraho mu 1996, ubwo Ubushinwa bwageragezaga kuburizamo amatora ya perezida bukora amagerageza y'ibisasu bya misile, Amerika ikohereza muri ako karere amato (ubwato) agwaho indege mu guhosha umwuka mubi hagati yabyo.
Kandi nubwo ibihugu bimwe by'i Burayi n'Amerika byavuze ko bitewe impungenge no kurata ingufu za gisirikare k'Ubushinwa, Perezida w'Amerika Joe Biden yavuze ko Bwana Xi yemeye gukurikiza "amasezerano ya Taiwan".
Bisa nkaho Bwana Biden yakomozaga ku masezerano y'Amerika amaze igihe ya gahunda y'"Ubushinwa bumwe" aho yemera Ubushinwa aho kwemera Taiwan.
Ariko, aya masezerano anemerera Amerika kugumishaho umubano na Taiwan "ukomeye utari uwo ku mugaragaro". Amerika igurisha intwaro kuri Taiwan, bijyanye n'umubano bifitanye ukubiye mu kizwi nka Taiwan Relations Act, uteganya ko Amerika igomba gufasha Taiwan kwirwanaho.
Gahunda y'"Ubushinwa Bumwe", bicyekwa ko ari yo Bwana Biden na Bwana Xi bakomojeho, ni izingiro ry'ingenzi ry'umubano w'Ubushinwa n'Amerika ariko itandukanye n'ihame ry'Ubushinwa Bumwe, aho Ubushinwa bushimangira ko Taiwan ari igice ntakurwaho cy'Ubushinwa bumwe, umunsi umwe kizongera guhuzwa na bwo.
