Algeria: Umuriro w'ishyamba watumye umuhanzi afatwa agatwikwa ari muzima

Umunyamakuru wa BBC Kayleen Devlin abara inkuru y'umuhanzi ukiri muto wagiye gufasha kuzimya inkongi y'imiriro muri Algeria ariko agafatwa akicwa n'imbaga y'abantu.

Tariki 09 z'uku kwezi kwa munani, Algeria yibasiwe imiriro y'ishyamba ikomeye mu mateka y'iki gihugu, imiriro 71 yafashe ibice bitandukanye mu ntara 18 imara iminsi itatu iyogoza. Abantu bagera kuri 90 barapfuye, abandi benshi barakomereka.

Akarere ka Kabylie, mu burasirazuba niko kibasiwe cyane. Amashusho ababaje yerekana ingo ziri gushya ku misozi.

Abaturage baboneka bari guhunga ingo zabo abandi bagerageza kuzimya bakoresheje amashami, indobo z'amazi, ibitaka n'ibindi..

Iminsi ibiri nyuma y'uko izi nkongi zitangiye, umuhanzi Djamel Ben Ismail yanditse kuri Twitter ko agiye gukora 322km avuye iwabo ahitwa Miliana akajya "gufasha inshuti zacu" kurwanya izi nkongi.

Kuri Facebook ye, yatangaje amakuru yatangajwe mbere asaba ubufasha muri iki kibazo.

Umwe mu nshuti ze avuga ko Ben Ismael yari "umuhanzi muto ukunda guitar kandi ukunda ubuzima...ntiyari umunyarugomo."

Ariko amaze kugera ahitwa Tizi Ouzou mu karere ka Kabylie, ntiyari azi ko ariho ubuzima bwe bugiye kurangirizwa imburagihe.

Tariki 11 z'uku kwezi kwa munani, amashusho yatangiye gukwirakwira agaragaza Ben Ismael agirirwa nabi n'imbaga.

Hari nyuma yo kwibeshywaho agakekwaho gukongeza inkongi z'imiriro, abantu b'aho bamukoreye iyicarubozo maze baramutwika mbere yo kujyana umurambo we ku mbuga y'akarubanda muri ako karere.

Ayo mashusho yahise ateza uburakari mu gihugu.

Umuvandimwe we yasabye abakoresha imbuga nkoranyambaga gusiba ayo mashusho. Avuga ko nyina, kugeza ubu atazi uko umuhungu we yapfuye.

Se wa Ben Ismael avuga ko "yashenguwe". Ati: "Umuhungu wanjye yagiye agiye gufasha abavandimwe be b'i Kabylie, agace akunda. Bamutwika ari muzima."

Ibinyamakuru byaho bivuga ko ubwoba n'ibihuha byakwiriye mu gace ka Tizi Ouzou byatumye abaho bacyeka abantu batwaye imodoka zifite ibirango byo mu zindi ntara.

Umugoroba mbere y'uko Ben Ismael yicwa, minisitiri w'intebe Aymen Benabderrahmane yari yavuze ko iyi miriro iva "ku bikorwa by'ubugizi bwa nabi".

Mu butumwa yatanze kuri televiziyo, yagize ati: "Iperereza ry'ibanze muri Tizi Ouzou ryerekanye ko intangiriro y'iyi miriro yari igamije guteza igikombo kinini gishoboka."

Kuri uwo munsi, minisitiri w'ubutegetsi bw'igihugu Kamel Beldjoud yasuye Tizi Ouzou, abwira abanyamakuru ko iyi miriro yatewe "n'abagizi ba nabi buzuye urwango ku gihugu cyacu."

Kuwa gatatu w'iki cyumweru, Algeria yise Maroc "igihugu cy'umwanzi" iyishinja kuba inyuma y'itsinda rishaka ubwigenge bwa Kabylie mu bikorwa by'ubugizi bwa nabi no kwica Djamel Ben Ismael.

BBC Monitoring ivuga ko nta mutegetsi cyangwa itangamakuru muri icyo gihugu ryavuze ko ihindagurika ry'ikirere ryaba inkomoko y'iyi miriro no kwihuta cyane kwayo.

Nubwo bwose igipimo cy'ubushyuhe cyari kigeze kuri 46C mu cyumweru gishize ubwo iyi miriro yacaga ibintu.

Icyo gihe kandi nibwo raporo y'abahanga ba ONU/UN yasohotse iburira ubushyuhe bukabije, amapfa n'imyuzure ku isi.

Nyuma y'iyicwa rya Ben Ismael bamwe muri rubanda barahigira kwihorera.

Bamwe mu bakoresha imbuga nkoranyambaga batangaje amashusho y'abakekwaho kumwica, bagerageza kumenya abo ari bo, abandi basaba ko ahabwa ubutabera.

Kugeza ubu, abantu 61 bamaze gufungwa baregwa kwica Ben Ismael, haratungwa urutoki abagize Movement for the Self-Determination of Kabylie (MAK) bashaka ko ako gace kigenga.

Mu kwezi kwa gatanu, iryo shyaka leta ya Algeria yaryise umutwe w'iterabwoba.

Kuwa kabiri tariki 17 z'ukwa munani, televiziyo y'igihugu yerekanye bamwe mu bagize MAK "bemera" kwica uriya muhanzi, nubwo iperereza rigikomeje.