Afghanistan: Amafoto: Kabul - umunsi umwe nyuma yo gufatwa n'Abataliban

Abataliban bari gushinga ubutegetsi bwabo nyuma y'uko ku cyumweru bafashe batarwanye umurwa mukuru Kabul.

Perezida Ashraf Ghani wa Afghanistan yahunze igihugu, bivugwa ko yahungiye muri Uzbekistan.

Aya ni amwe mu mafoto yo mu murwa mukuru ku wa mbere.

Ubuzima burasa n'ubusanzwe mu mujyi hagati, nk'uko umunyamakuru Malik Mudassir wa BBC abivuga.

Gusa hari imodoka nke mu mihanda ugereranyije n'ubusanzwe, amaduka menshi arafunze. Ariko abantu barasa n'aho batuje.

Gusa ku kibuga cy'indege, ibintu birakomeye, amashusho yaho ateye ubwoba, nk'uko umunyamakuru wa BBC abivuga.

Kuri iki kibuga cy'indege ubu hari abasirikare 2,500 ba Amerika, n'abandi 500 bahagera mu masaha aza, nk'uko byatangajwe n'umuvugizi w'igisirikare cya Amerika John Kirby.

Abasirikare ba Amerika - baboneka mu ifoto ikurikiyeho - bari "kugarura umutekano", nk'uko Kirby abivuga, mu gihe babaye bahagaritse kuguruka kw'indege zose.

Amashusho yashyizwe ku mbunga nkoranyambaga yerekana abasivili binaganika ku ndege y'ingabo za Amerika mu gihe yariho yitegura kuguruka.

Amnesty International yasabye umuryango mpuzamahanga gufatanya "kurinda ko habaho icyago kurushaho".

Agnes Callamard, umunyamabanga mukuru wayo yagize ati: "Ibyo turi kubona muri Afghanistan ni icyago cyabonekaga na mbere, kirirengagizwa."

Amafoto yose agomba gutangirwa uburenganzira.