Afghanistan – Kabul: 'Dutegereje guhererekanya ubutegetsi mu mahoro' – Umuvugizi w'aba Taliban

Umuvugizi w'aba Taliban yabwiye umunyamakuru wa BBC Yalda Hakim ko "nta kwihorera kuzabaho" ku baturage ba Afghanistan.

Suhail Shaheen yabwiye BBC ati: "Dusezeranyije abaturage ba Afghanistan, by'umwihariko abo mu mujyi wa Kabul, ko imitungo yabo, ubuzima bwabo biri mu mutekano - nta kwihorera kuzabaho ku muntu uwo ari we wese".

"Turi abakozi ba rubanda n'ab'iki gihugu".

"Ubutegetsi bwacu bwategetse ingabo zacu kuguma ku irembo rya Kabul - kutinjira mu mujyi. Dutegereje guhererekanya ubutegetsi mu mahoro".

Amakuru avuga ko Perezida Ashraf Ghani yahunze igihugu, mu gihe aba Taliban bageze i Kabul.

Ibiro ntaramakuru Reuters bisubiramo amagambo y'umutegetsi wo hejuru muri minisiteri y'ubutegetsi bw'igihugu avuga ko yerekeje mu gihugu cya Tajikistan bahana imbibi.

Umuvugizi w'aba Taliban yanavuze ko Abanya-Afghanistan bose bazagira uruhare muri leta ya kisilamu - bivuze ko Abanya-Afghanistan batari aba Taliban na bo bazayishyirwamo. Yanasezeranyije ko bazubahiriza uburenganzira bw'abagore n'ubw'itangazamakuru.

Mbere ubwo aba Taliban bari ku butegetsi muri Afghanistan, hagati ya 1996 na 2001, bakoreshaga ubwoko bw'amategeko ya Sharia burimo no kwicisha amabuye uwafashwe asambana, guca ibiganza abahamwe no kwiba, ndetse no kubuza abakobwa kwiga kurenza bafite imyaka 12.

Umuvugizi w'aba Taliban yavuze ko abagore bazemererwa kuva mu ngo bo ubwabo kandi ko bazakomeza kwiga no kujya ku kazi.

Ariko ibyo bitandukanye n'amakuru arimo kuva mu bindi bice by'igihugu byigaruriwe n'aba Taliban. Mu mujyi wa Kandahar, abagore bakora muri banki babwiwe ko akazi kabo ubu kagiye kujya gakorwa na benewabo (abo bafitanye isano) b'abagabo.

Mu tundi turere, hari amakuru ko abagore batarimo kwemererwa kugira aho bajya bonyine ndetse bagahatirwa kwambara imyitandiro ibapfuka hose.

Umuvugizi w'aba Taliban yongeyeho ko ibitangazamakuru bizemererwa kunenga mu bwisanzure ibitagenda, ariko ntibijye mu "kwica umuntu ahagaze", cyangwa guharabika, (ibizwi nka 'character assassination').

Mbere yaho kuri iki cyumweru, aba Taliban basohoye itangazo bavuga ko inshingano ku mutekano w'uyu mujyi zigifitwe na leta ya Afghanistan kugeza muri aka kanya, rishimangira ko ibiganiro ku guhererekanya ubutegetsi mu mahoro bikomeje.

Rikomeza rishishikariza Abanya-Afghanistan kuguma mu gihugu, rivuga ko aba Taliban bashaka ko abaturage "b'ingeri zose bibona mu butegetsi buri imbere bwa kisilamu bwa leta yubahiriza inshingano yo gukorera bose kandi ibereye bose".

Ariko hari amakuru avuga ko i Kabul humvikanye urusaku rw'amasasu kandi ko aba Taliban babonetse mu mihanda bafite amabendera.

Ibyatangajwe n'aba Taliban kuri iki cyumweru bisa nk'ibigamije kumara impungenge amahanga.

Ku wa gatandatu, mu ijambo rye rya mbere yagejeje ku gihugu kuva aba Taliban bakungikanya ibitero, Perezida Ashraf Ghani yavuze ko igihugu kiri "mu byago bikomeye".

Yongeyeho ko hari gufatwa ingamba zo kuvugurura inzego z'umutekano za Afghanistan.

Ariko amakuru yose kugeza ubu avuga ko aba Taliban - intagondwa zigendera ku mahame akaze yiyitirira Islam - nta kibazo gikomeye bahuye na cyo ubwo batangiraga kugenda berekeza i Kabul.

'Guhererekanya ubutegetsi mu mahoro'

Minisitiri w'ubutegetsi bw'igihugu wa Afghanistan uriho muri iki gihe yagaragaye muri videwo, yatangajwe n'igitangazamakuru Tolo TV cyo muri iki gihugu, avuga ko hazabaho "guhererekanya ubutegetsi mu mahoro" na leta y'inzibacyuho (imfatakibanza mu Kirundi). Yavuze ko Kabul itazagabwaho igitero.

Ibiro ntaramakuru Associated Press - bisubiramo amagambo y'umutegetsi wo muri Afghanistan - byatangaje ko abari mu biganiro b'aba Taliban berekeje ku ngoro ya perezida gutegura "ihererekanya" ry'ubutegetsi.

Umunyamakuru wa BBC uri i Kabul avuga ko amaduka n'amasoko menshi yafunze kuri iki cyumweru, kandi ko abantu bamwe barimo kuvuga ko "nta kindi gihe bigeze bahangayika cyane nk'ubu".

Ibiro bimwe bya leta na byo byafunze, hamwe na hamwe abasirikare n'abapolisi bata uburinzi bwabo.

Kugera i Kabul bibaye hashize amasaha aba Taliban bigaruriye umujyi wa Jalalabad mu burasirazuba - nta kurwana kubayeho.

Uku gutsinsurwa kwihuse kw'ingabo za leta ya Afghanistan kwatumye Perezida Ghani akomeza kotswa igitutu ngo yegure.

Amerika yakajije ibikorwa byo guhungisha abakozi b'ambasade yayo i Kabul, aho yohereje abasirikare 5,000 bo gufasha.

Intambara yo mu bitekerezo y'aba Taliban

Isesengura rya Anbarasan Ethirajan, umunyamakuru mu ishami ry'isi rya BBC

Guta umutwe no gushya ubwoba byasaze Kabul nyuma y'amakuru yuko abarwanyi b'aba Taliban babonywe mu nkengero z'uyu murwa mukuru.

Mugenzi wanjye yambwiye ko bimwe mu biro bya leta byasabye abakozi kuhava n'amaduka arafungwa. Nta mpamvu yatanzwe.

Mu gufata uturere duhana imbibi n'uyu mujyi, aba Taliban bitezweho kugambirira gufata Kabul, umujyi ukomeye umwe wonyine usigaye mu maboko ya leta.

Birashoboka ko abarwanyi benshi b'aba Taliban bamaze gucengera muri Kabul cyangwa banamaze igihe baba muri uyu mujyi. Mu bya gisirikare, ubu ibintu byose biri mu nyungu zabo muri iki gihe, kandi bari mu mwanya wo kugena ibintu uko bashaka.

Imirwano iyo ari yo yose yabera muri Kabul yakwicirwamo abaturage benshi b'abasivile kandi yatembamo imivu y'amaraso. Ibyo aba Taliban barabizi neza, none barashaka gutanga ubutumwa ku mahanga ko bo ari bashya batandukanye n'abahozeho mbere bahagarariye.

Bahaye inzira mu mutekano benshi mu basirikare ba leta n'abategetsi bamanitse amaboko mu zindi ntara. Intambara yabo yo mu bitekerezo ku nzego z'umutekano za Afghanistan, kugeza ubu yatanze umusaruro - intara nyinshi zatanzwe nta mirwano ibayeho.

Bashobora gukina uwo mukino no kuri Kabul, mu gihe ibihugu by'i Burayi n'Amerika bihungisha abaturage babyo. Bacyeneye kwemerwa mu mahanga kandi bacyeneye n'imfashanyo.

Aba Taliban basanzwe baramaze gutangaza ko kugenda kw'ingabo z'Amerika kugaragaza ko batsinze igisirikare cya mbere gikomeye ku isi.

Ntabwo byatangaza mu gihe bamwe mu bategetsi babo batekereza ko byaba ari intsinzi ikomeye yo mu rwego rw'icengezamatwara, banahagarikiye ibikorwa by'Amerika n'Ubwongereza byo gucyura abaturage babyo mu minsi iri imbere.