Rwanda - Covid: Ibimenyetso by'ubwoko bwa Delta mu bipimo bihakorerwa

Minisitiri w'ubuzima yatangaje ko hari ibigaragaza ko ubu bwoko bwa Covid-19 bwabonetse bwa mbere mu Buhinde bwamaze kugera no mu Rwanda.

Mu byumweru bine bishize imibare y'abandura n'abicwa na Covid mu Rwanda yarazamutse ku rugero rutabayeho kuva iki cyorezo cyahagera mu kwa gatatu 2020.

Minisitiri w'ubuzima Dr Daniel Ngamije yabwiye televiziyo y'u Rwanda ati: "Ibipimo turi gukora biri kutwereka ko hari ibimenyetso simusiga ko Delta variant ihari mu Rwanda."

Ubu bwoko bushya bw'iyi virus bwandura vuba kandi bufite ibimenyetso bikaze kurushaho, mu karere bwamaze kuboneka no muri DR Congo, Uganda na Kenya.

Ishami rya ONU ryita ku buzima OMS/WHO rivuga ko ubu bwoko ari bwo buri guteza inkubiri ya gatatu ya Covid mu bihugu byinshi bya Africa.

90% by'abanduye bari mu ngo iwabo

Mu gihe umubare w'abandura ndetse n'abahitanwa na Covid-19 ukomeza kwiyongera, hariho impungenge ko ibitaro bishobora kurengerwa, mu gihe abarwaje ababo mu rugo na bo batinya kwandura.

Umugabo urwaje umugore n'umwana wadusabye kutavuga umwirondoro we, yatubwiye ko bitamworoheye kwita ku barwayi babiri bategetswe kuguma mu kato mu rugo.

Avuga ko hashize icyumweru umuryango ugiye kwipimisha ibisubizo bikerekana ko umugore n'umwana umwe banduye,na ho umugabo n'abandi bana babiribakaba ari bazima.

Uyu mugabo avuga ko abarwayi yabashyize ukwabomu kato ariko ko bitoroshye kwirinda umuntu mubana.

Ngo uretse ubutumwa bugufi yohererezwa n'inzego z'ubuzima, ngo nta muganga urahagera ngo ababwire uko bagomba kwitwara.

Kuri ubu uyu mugabo asigaje icyumweru kimwe ngo yongere gupimisha abarwayi, ariko akaba afite ubwoba ko we n'abana bashobora kuba na bo baranduye.

Iki kibazo gishobora kuba gifitwe n'abantu benshi, dore ko ubu igihugu kibarura abarwayi bagera ku bihumbi 15 kandi abagera kuri 90% b'uyu mubare bakaba barwariye mu ngo zabo kuko bafatwa nk'abatarembye.

Imibare igaragaza ko ubwandu bwiyongereye cyane guhera mu kwezi gushize. Muri iki cyumweru kimwe gusa cy'ukwezi kwa 7 hamaze kwandura abasaga 5000, na ho abagera kuri 69 ni bo bamaze guhitanwa n'iki cyorezo mu gihe cy'icyumweru kimwe gusa.

Inzego z'ubuzima zivuga ko ibitaro byita ku barwayi ba Covid-19 bisa n'ibigiye kurengerwa ndetse ko n'ubushobozi bwo kongerera umwuka indembe bushobora kubura mu gihe ubwandu bwakomeza kuzamuka.

Hashize icyumweru ubutegetsi butangaje ibihe bidasanzwe aho abatuye umujyi wa Kigali batemerewe kuwusohokamo ndetse n'abavuye mu ntara ntibemererwe kwinjira mu mujyi wa Kigali.

Mu gihe hagitegerejwe ingamba nshya zizatangazwa nyuma y'icyumweru kimwe, imibare yo ikomeje kuzamuka yaba iy'abashya bandura ndetse n'umubare w'abahitanwa n'iki cyorezo.